Ko'rishlar soni: 1,100 

Rejissura va aktyor mahorati

Өзбекстан Республикасының Биринши  Президентиниң 2008-жыл 28-апрельдеги «Өзбекстан мәмлекетлик көркем өнер институтының Нөкис филиалын шөлкемлестириў бойынша илажлар ҳаққында»ғы ПҚ-845 санлы қарарында «Қарақалпақ халқының бийтәкирәр көркем өнерин ҳәм мәдениятын буннан былай да раўажландырыў, талантлы жасларды миллий ҳәм дүнья жүзлик көркем өнердиң жоқары үлгилери руўхында тәрбиялаў, олардың дөретиўшилик қәбилетин ҳәм интасын  ҳәр тәреплеме қоллап-қуўатлаў және жүзеге шығарыў, заманагөй театр ҳәм кино, телевидение ҳәм радио бағдарлары бойынша жоқары маманлықтағы актерлар ҳәм көркем өнер саласында қәнигелерди таярлаў системасын жетилистириў» кереклиги, сондай-ақ Өзбекстан Республикасы Президентиниң 2012-жыл 4-июньдағы «Өзбекстан мәмлекетлик көркем өнер ҳәм мәденият институтын шөлкемлестириў ҳаққында»ғы ПҚ-1771 санлы қарары менен филиалымыз Өзбекстан мəмлекетлик көркем-өнер ҳəм мəденият институты Нөкис филиалы болып қайта шөлкемлестирилди.

Филиалымыздың ашылған   жылы  25-студент қабылланып, Өзбекистан Республикасына хызмет көрсеткен артист Өмирбай Косымбетов 2008-2013 жыллар аралығында басшылық етти. 2013-жылдан баслап филиалға “Тарийх илимлериниң кандидаты Пахратдин Палуаниязов басшылық етип келмекте.   Ҳəзирги ўакытта бул билим дəргайында 321  студент «Актёрлык», «Режиссёрлык», «Кино, теливедение ҳәм радио сес режиссерлығы», «Мəденият ҳəм көркем-өнер мекемелерин шөлкемлестириў ҳәм басқарыў», «Фольклор ҳәм этнография»,  «Кино ҳәм телевидение  режиссёрлығы», «Қуўыршақ театр режиссёрлығы», «Кинотелеоператорлық»,  «Китапханашылық ҳәм библиография», «Сахна ҳәм экран өнери драматургиясы», «Вокал атқарыӯшылығы», “Саз –әсбаплар жәмәәтин басқарыӯ”, “Қосықшылық ҳәм ойын өнери” сыяқлы бағдарлар  бойынша қəнийгелик сырларын үйренбекте.

2011-2012 окыў жылында филиалымызда еки қəнийгелик: «Драма театры ҳəм кино актёрлығы» сондай-ақ «Сахна ҳəм экран өнери  драматургиясы» қəнийгелиги бойынша туңғыш «қарлығашлар» питкерип шыкты. Қарақалпақстан Республикасына хызмет көрсеткен көркем-өнер ғайраткери Бердибай Өтебаев ҳəм «Нихол» сыйлығының лауреаты, Қарақалпақстан Республикасына хызмет көрсеткен артист Сарбиназ Аннақуловалардың басшылығындағы  сахналастырылған қəнийгелик диплом спектакльлери Жан Батист Мольердиң «Скапенниң ҳийлеси» ҳәмде Насрулла Қобиловтың «Уйым» атлы сахналық шығармалары мəмлекетлик аттестация комиссиясы ҳəм кең жəмийетшилик тəрепинен жоқары бахаланды. Бүгинги күнде дəслепки «қарлығаш»ларымыздан Баҳадыр Разымбетов- Қарақалпақстан Республикасына хызмет көрсеткен артист,  Алтынай Бердибаева, Азиз Назарымбетов, Фазылбек Келимбетов ҳəм тағы баскалар өз қəнийгеликлери бойынша республикамыздың театрларында хызмет етпекте.

2012-2013 оқыӯ жылы  «Музыкалы театр актёрлыгы» бөлими Өзбекстан Республикасына хызмет көрсеткен артист Марьш Исмаилованын басшылыгында А.Цагарели, Г.Канчелидиң «Ханума» ҳəм ағалы-инили Гриммлердиң «Бремен сазенделери» спектакльлерин сахналастырып көпшиликтиң ҳүрметине мияссар болды. Спектакльлер үлкен сахнада қойылып Мәмлекетлик аттестация комиссиясы тәрепинен жоқары баҳаланды.  Бул бөлим Ташкент қаласында  өткерилген «Студентлер дөретиўшилиги» фестивалына «Ханума» спектакли менен қатнасып «Жылдың ең жақсы сахналық дөретпеси» номинациясын женип алыўға миясар болды.

«Көркем-өнер таныў журналистикасы» қəнийгелигин  питкериўши студентлерде  қарақалпақ көркем өнери бойынша ҳəр қыйлы темада диплом жумысларын табыслы жақлап шықты. Филиал студент жаслары тыянақлы билим алыў менен бир қатарда республика көлеминдеги фестивальларға да белсене қатнасып, жақсы нəтийжелерге еристи. «Көркем өнертаныў журналистикасы» бөлиминиң питкериўшилери Гулмира Палўанова, Дариха Дарушева ҳəм Анар Жақсымуратовалар  тек ғана журналистика бағдарында қəлем тербетип қоймастан, драматургияда да өзлерин сынап көрип «Өкиниш», «Соңғы пушайман», «Қырсық қораз» сыяқлы дөретпелери менен халық театрлары фестивальларына қатнасып сыйлы орынларды ийеледи.

Филиал жаслары Республика көлеминде ҳәр жылы өткерилип киятырган «Наўрыз», «Ғəрезсизлик» байрамларына, сондай-ақ «Жалғызсаң сен муқаддес Ўатан» таңлаўына белсене қатнасып өз дөретиўшилик қəбилетлерин ҳəр тəреплеме  көрсетип келмекте. Мəселен Инабат Жуманиязова, Гульёр Аннаклычева, Инжайым Көмекбаевалар «Наўрыз» «Ғəрезсизлик» байрамларының концерт бағдарламаларында қатнасып тамашагөйлердиң алғысларына сазаўар болды. Усы бөлимниң студенти Ислам Махамадияров болса Республикалық Атажан Худайшукуров атындағы таңлаўда қатнасып, 3-орынды жеңип алыўға миясар болды. Бул да болса филиалымызда дөретиўшилик жумысларға айырықша итибар қаратылып атырғанынан дерек береди.

«Телевидение ҳəм радио режиссёрлығы» бөлими студентлери курс басшысы Бектилеў Низаматдинов тəрепинен сахналастырылған Абдулла Тажибаевтын «Артист» спектакли менен Ургенш қаласында өткерилген «Талабалар бахори» фестивалына қатнасып, биринши орынды женип алыўға миясар болды.

Өзбекстан халық артисти Нажиматдин Аңсатбаевтың басшылығында «Драма театры режиссёрлыгы» бөлими студентлери  Уснатдинова Айсулыў –Ч.Айтматовтың “Ана жер ана”, Кощанова Гулшарапат –Уйгын, Иззат Султанның “Алишер Наўайы”, Абдуллаев Бекмухаммед- К.Рахмановтың  “Ынжықтың муҳаббаты”, Утепбаев Азамат –А.Кахҳардың “Сақ ғарға сағағынан”, Бекжанов Ɵсербай –М.Каримниң “Ай тутылған түнде”, Асметуллаева Наргиза –К.Рахмановтың “Жаралы жүреклер” Нурымбетов Әжинияз –Қ.Матмуратовтың “Бир үйде еки ɵмир”, Исаева Гулбаҳар –К.Рахмановтың “Ɵлим жазасы” спектакллерин  табыслы сахналастырды.

“Эстрада актёрлығы” бөлиминиң студентлери оқытыўшы Л.Уразмбетованың режиссерлығында белгили рус жазыӯшысы А.П.Чехов шығармалары тийкарында «Дүньяға көринбес көз жаслар», «Астан-кестен», «Судтан алдыңғы түн» атлы бенефис-диплом спектаклин сахналастырды. Сондай-ақ өзимиздиң  филиалдың биринши “Карлығашларынан” болған жас драматург А.Исмаиловтың пьесасы тийкарында сахналастырылған  «Тебренбес жүреклер» атлы диплом спектакли де тамашагөйлер тәрепинен жаксы күтип алынды.        2014-2015 оқыӯ жылы      «Драма театр ҳәм кино актёрлығы» бөлиминиң студентлери оқытыўшы Амангелди Кудайназаровтың басшылығында япон драматурги Дзуиндзи Киноситоның «Тырна пәрлери» атлы диплом алды спектаклин, В.Шекспирдиң «Гамлет»  диплом спектакллерин  сахналастырып шет ел драматургиясы үлгилерин қарақалпақ сахнасына алып кирди, буның өзи қарақалпақ көркем өнериндеги үлкен бир жаңалық  болды деп толық исеним менен айта аламыз.

Карақалпақ мәмлекетлик қуўыршақ театрында кафедра оқытыўшысы К.Қалилаев  ҳәм Н.Пиримбетова тәрепинен  «Қуўыршақ театр актёрлығы» жөнелиси талабалары менен рус драматурги С.Михалковтың «Үш торай» атлы ертек пьесасы, Оқытыўшы М.Хожанованың «Достыңнан тап»,  Ж.Хожановтың «Мәртлик пенен жаўызлық» атлы еки бөлимли ертек пьесалары сахналастырылды.

2015 жылы «Актёрлық көркем-өнери» жөнелисиниң «Куӯыршак театры актёрлыгы» болиминиң студентлери Ж.Хожановтың «Аққуў ҳаққында аңыз» атлы диплом спектаклин сахналастырып, жас тамашагөйлеримиздиң руӯхый раӯажланыӯына өз үлесин қосты.

2015-2016 оқыӯ жылында  «Музыкалы театр актёрлыгы» ҳәм «Музыкалы театр режиссёрлыгы» бөлимлери студентлери  Өзбекстан халық артисти Мырзагул Сапаева ҳəм Қарақалпақстанға хызмет көрсеткен артист Сəрсенбай Узақбаевлардың  басшылыкларында  сахналастырылған  Ж.Хожановтың «Қоңсының қызы», С.Хожаниязовтың  «Сүймегенге сүйкенбе» , “музыкалы диплом спектакллери кең жәмийетшилик тәрепинен айрықша баҳаланды. “Музыкалы театр режиссёрлығы” бɵлими студентлери  Ɵтепбергенов Ажинияз –Н.Қосимовтың “Адасқанлар”, Илаўатдинова Жулдыз –Ч.Айтматовтың “Жамила”, Қайпанова Рано- А.П.Чеховтың “Хор қосықшысы”, Оразымбетов Султан –Ниль Саймонның “Мийманхана”, Шарипов Ажинияз –К.Рахмановтын “Ɵлим жазасы”, Есбергенов Руслан –У.Қошимовтың “Кутлы болсын тойларыңыз” спектакльлерин С.Узақбаевтың басшылығында сахналастырып, мәмлекетлик комиссия баслығы Н.Қобилов тәрепинен жоқары баҳаланды.

Филиалда «Кино, телевидение ҳəм радио сес режиссёрлығы» бөлиминиң  студентлери  оқытыўшы Караматдин Заретдинов басшылығында диплом қәнийгелик жумысларына «Көркем  ҳәм хүжжетли фильмлер» дөретип, усы  бөлимниң студентлери келешекте сес режиссёры қəнийгеси болып жетисиў ушын, республикамызда өткерилип атырған республикалық көлемдеги концерт бағдарламаларында қатнасып тəжирийбе топламақта.  

2016-2017 оқыӯ жылы «Эстрада актёрлығы» бөлими студентлери курс басшысы Карақалпақстан Республикасына хызмет көрсеткен артист Б.Назарымбетов ҳәм пән оқытыӯшысы Г.Бекниязова  тәрепинен Исфандияр ҳәм Богдасаровтың «Кыянет» диплом спектаклин сахналастырды. Спектакль усы жылғы «Талабалар студиясы» таңлаӯында «Жылдың ең жақсы» спектакли номинациясын жеңип алыӯга мияссар болды. Л.Уразмбетова басшылығындағы  «Эстрада ҳәм массалық тамашалар режиссёрлығы» бөлими студентлери  Фархад Бекниязов -Султанали Балғабаевтың  «Қыз жигирмаға шыққанда» спектаклин, Өмирбек Бектурғанов-Мехрибан Хожанованың «Қыдыр ата ҳәм шайтан» фантастикалық драмасы тийкарында «Ақ ҳәм қара» спектаклин, Алтынбек Бердибаев- Сайлаўбай Жумағуловтың «Адамлар қалай бузылған» ертек -пьесасы тийкарында «Абайлы болың адамлар» спектаклин, Гөззал Далиева-Антон Павлович Чеховтың  «Калхас»  пьесасы  тийкарында «Калхас» спектаклин қәнийгелик диплом жумыслары сыпатында сахналастырды.

Усы жылы «Фольклор жамәәтлерин басқарыӯ» бөлими студентлери курс басшысы Қарақалпақстан халық бақсысы, «Зульфия» сыйлығы ҳәм «Дослық» ордениниң ийеси Г.Ахымбетова басшылығында диплом қәнийгелик жумысларын мәмлекетлик комиссиясы ағзалары ҳәм кең жәмийетшиликке ылайықлы түрде тапсырып айрықша баҳаларға еристи. «Телевидение ҳәм радио режиссёрлығы» бөлими курс басшысы Б.Низаматдиновтың басшылығында көркем ҳәм ҳүжжетли фильмлер жаратты. Усы курстың студенти Марс Орынбасаровтың –Мубәрек Рустамованың «Қалалы мүғаллим» гүрриңи тийкарында ислеген «Устаз» фильми Өзбекистан көлеминде өткерилген жас кинорежиссёрлар таңлаӯынында қатнасқан 200 ден аслам фильмниң ишинен  сыйлы 3-орынды жеңип алған болса. Халықаралық “Пролог” кинофестивалында” “Устаз” фильми “Жылдың ең жақсы қысқа метражлы көркемфильми” номинациясына ылайық деп табылды.

2017-2018 оқыӯ жылы питкериўшилеримиз “Музыкалы театр актёрлығы” бөлими студентлери курс басшысы Қарақалпақстан халық артисти Жалғасбай Султабаевтың басшылығында Оразбай Рахмановтың “Тирсеклер” ҳәм Кеңесбай Рахмановтың “Тогыз тоңкылдақ ҳәм бир шиңкилдек” спектакльлерин жоқары дәрежеде тамашагөйлер нәзерине усынды.

-2019 оқыў жылы болса Өзбекистан халық артисти Нажиматдин Ансатбаевтың басшылығында “Музыкалы театр актёрлығы” бөлими студентлери Узеир Гаджибековтың “Аршын-мал алан” ҳәм Байсейитов ҳәм Шаңкытбаевлар авторлығындағы  “Үш бойдақ” спектакльлери аттестация комиссиясы  тәрепинен  айрықша баҳаларға баҳаланды.       Ҳәзирги ӯақытта филиалымызда  1-факультет, 4-кафедрада   35 профессор оқытыўшы профессор- оқытыӯшы студентлерге билим бермекте. Өткен оқыў жылы филиалымыз оқытыўшыларынан Өзбекистан Республикасына хызмет көрсеткен артист Марьяш  Исмаилова ҳәм “Көркемөнер таныў” факультети деканы, тарийх илимлери кандидаты Гулшира Ходжаметовалар Жоқары Аттестация комиссиясы тәрепинен “доцент” илимий атағын алыўға мияссар болды.