Bıyıl qaraqalpaq tiline mámleketlik til biyligi berilgenligine 31 jıl toldı. Sáne múnásibeti menen Ózbekstan mámleketlik kórkem óner hám mádeniyat institutı Nókis filialında «Ana tilim – maqtanıshım udayı» atamasında bayram ilajı bolıp ótti.

Ilajdı filial jaslar awqamı jetekshisi J. Berdimuratov ashtı hám alıp bardı.

Ótkerilgen ilajda qaraqalpaq tiline mámleketlik til biyligi berilgenligi, tildiń jámiyet rawajlanıwındaǵı hám jaslardı tárbiyalawdaǵı áhmiyeti, onıń sap hám taza túrinde qollanılıwı boyınsha keń túrde túsinik berildi.

Ana til bul xalqımızdıń aytar sózi hám jańlar hawazı. Til bar eken millet onıń menen birge ómir súredi, – deydi social-gumanitar pánler kafedrası oqıtıwshısı, f.i.k. A.Prekeeva. -Ana tilimiz bul biziń maqtanıshımız. Búgingi kúnde qaraqalpaq xalıq awızeki dóretpeleriniń 100 tomlıǵı baspadan shıqqan bolsa, jáne 100 tomǵa shamalas qoljazbalarǵa iyemiz.

Ana-tilimiz sahrayı xalqımız benen sonsha dáwir qısıwmeti, ásirler asıwı, zamanlar almasıwında búgingi kúnge shekem jetip keldi, qaharman xalqımız bolsa óz tilin saqlap qala aldı. Solay eken keleshek áwladlarımızdı Watansúyiwshilik ruwxında tárbiyalaw, sadıq hám qıraǵı, haqıyqıy el perzenti etip kamalǵa keltiriwimizde ana tilimizdiń áhmiyeti ayrıqsha.

ÓzMKÓMI Nókis filialı baspasóz xızmeti

 15,650