ТАҢЛАЎДА ӨЗ ҚӘБИЛЕТЛЕРИН КӨРСЕТТИ

«8-март Халықаралық ҳаял-қызлар күни» мүнәсибети менен республикамыздың барлық орынларында байрам кешелери шөлкемлестирилмекте.

Жәмийетимизде ҳаял-қызлардың орнын асрырыў, оларға болған итибарды күшейтиў, аналарымыздың саламат әўлад тәрбиялаўдағы муқаддес ўазыйпасын мүнәсип  хошаметлеў мәмлекетимизде жақсы жолға қойылған.

Өзбекстан мәмлекетлик көркем өнер ҳәм мәденият институты Нөкис филиалында студент қызлар арасында «Қәнекей қызлар!!!» таңлаўы өткерилди. Таңлаўда студент қызлар 3 басқышта өзлериниң қәбилетлерин жыйналғанлар нәзерине усынды.

– Таңлаўда танысыў ҳәм өз қәбилетин көрсетиў шәртлери менен бирге «Ҳәййиў айтыў» шәрти арнаўлы түрде киргизилди, – дейди «Көркем өнертаныў» факультети Ҳаял-қызлар кеңеси жетекшиси С.Файзуллаева. – Буннан тийкарғы мақсет заманагөй турмысымызда дәстүрден қалып баратырған «ҳәййиў»ди болажақ аналар арасында үгит-нәсиятлаў болып табылады. Ҳәййиў арқалы ананың балаға болған меҳири, тәрбиясы ақ сүт пенен қоса бала руўхыятына сиңдирилетуғынлығы сахналық көринисте өз сәўлелениўин тапты.  

Үш басқыш даўамында студент қызлардың қәбилети сыннан өткерилип, улыўма нәтийжелер бойынша «Драматургия» қәнигелиги 1-курс студенти Нозима Улуғова биринши, «Вокал атқарыўшылығы» қәнигелиги 1-курс студенти Гүлхумар Орынбаева екинши, «Мәденият ҳәм көркем өнер мәкемелерин шөлкемлестириў ҳәм басқарыў» қәнигелиги 1-курс студенти Гүлжанат Қырқбаева үшинши орынға ылайық деп табылды.

Жеңимпазлар шөлкемлестириўшилер тәрепинен таярланған баҳалы саўғалар ҳәм ҳүрмет жарлықлар менен сыйлықланды.

 156 

Skip to content