МИНИСТР СТУДЕНТ-ЖАСЛАР МЕНЕН УШЫРАСТЫ

Көпшиликтиң хабары бар, Президентимиз Ш.Мирзиёев 2020-жыл 25-декабрь күни мәмлекетимиз жаслары менен видеоселектор тәризинде өткерилген Өзбекстан жаслары форумында ҳәр бир район ҳәм қаладан 5 ке шекем жасларды мәденият ҳәм көркем өнер тараўы бойынша жоқары оқыў орынларында жергиликли бюджет есабынан оқытылыўын атап өткен еди. Белгиленген ўазыйпалардың орынланыўын тәмийинлеўде Қарақалпақстан Республикасынан қала ҳәм районларынан мәденият ҳәм көркем өнер тараўында жумыс алып барып атырған 85 жас, Хорезм ўәлаятынан 65 жас Өзбекстан мәмлекетлик көркем өнер ҳәм мәденият институты Нөкис филиалына қабыл етилди.

Бүгин усы қабыл етилген студент-жаслар менен ушырасыў болып өтти. Оған студент-жаслар, кең жәмийетшилик ўәкиллери менен ғалаба хабар қуралларының хызметкерлери қатнасты.

Онда Қарақалпақстан Республикасы Мәденият министри Қ.Турдыев, Филиал директоры А.Аяпов ҳәм басқалар шығып сөйлеп, елимизде жаслар ушын жаратылған имканиятлардан нәтийжели пайдаланып студент болыў бахтына миясар болғанларды қутлықлап, усы дәргайда оқып билим алып мәденият ҳәм көркем өнер тараўының маман қәнигелери болып жетилисиўине тилеклеслик билдирди.   

Қабыл етилеген жәми 150 студент 2020-2021 оқыў жылынан баслап, тоғыз тәлим жөнелиси бойынша оқытылады. Олардың шәртнама төлемлери бес жыл даўамында жергиликли ҳәкимлик тәрепинен төлеп барылады. Әлбетте, бул имканиятлар елимизде жасларға қаратылған айрықша итибар ҳәм ғамқорлықтың айқын көриниси болып табылады.

ӨзМКӨМИ Нөкис филиалы баспасөз хызмети.

 143 

Skip to content