Filialımız «Social-gumanitar pánler» kafedrasınıń assistent-oqıtıwshısı Ernazarov Nurlanbek Esnazarovichtiń avtorlıǵında «Kásiplik motiv hám motivaciya» atamasındaǵı metodikalıq qollanba baspadan shıǵarıldı.

Óz jumısıńızdan zawıq alıw. Gáp mazmunına qosımsha túsinik beretuǵın bolsaq, bul – siz ózińizdiń talantıńız, potencialıńız, uqıbıńız, alǵan qánigeligińiz boyınsha ózińiz qálegen jámáátte jumıs islewińiz degeni. Bul álbette, unamlı qubılıs, kadrdıń jeke turmısı hám rawajlanıwı, shańaraqlıq baxtı ushın imkaniyat hám aydın keleshegin belgileytuǵın jol. Kim basshılıqqa uqıplı, kim qosshılıqqa degendey, bul processler ámeliyatta ózgerip bara beredi.

Avtor bul miynetinde mine, usı insannıń óz kásibinen qanatlanıwında, dóretiwshilik jumısınan ilhamlanıwında jáne kásiplik professionalıqqa erisiwinde motivlerdiń rolin joqarı, dep kórsetedi. Sonlıqtan, bul miynette sırt elli hám jergilikli ilimpazlardıń ilimiy-izertlew jumısları menen bahalı pikirlerine súyengen halda insannıń kásiplik kamalǵa jetiwinde zárúrli bolǵan insan tábiyatı, minez-qulqı hám mútájlikleri haqqında da maǵlıwmatlar berilgen.

   Metodikalıq qollanbada kásiplik motiv hám motivaciyaǵa keń túsinik berilip, motiv xám motivaciyalardıń túrleri hár tárepleme analizlenedi.

Juwmaqlap aytqanda, bul metodikalıq qollanba psixologiyalıq jáne pedagogikalıq xarakterge iye bolıp, onnan kópshilik jeke kásiplik miynet jolında paydalanıwına boladı.

Ch.Elmuratov