Usı jıl 12-oktyabr kúni Ózbekstan mámleketlik kórkem óner hám mádeniyat institutı Nókis filialında «Náshebentlik hám jınayatshılıqtıń aldın alıw» atamasında ushırasıw bolıp ótti.

Oǵan filial professor-oqıtıwshıları, student jaslar hám huqıq qorǵaw uyımlarınıń wákilleri qatnastı.

Ilajdı filial direktorı A.Ayapov basqarıp bardı. Onda Ózbekstan Respublikası Ministrler Kabineti janındaǵı nǝshebentlik zatlardı qadaǵalaw orayı bólim baslıǵı M.Óteniyazov, Ózbekstan Respublikası IIM Jınayat qıdırıw bas basqarması bólim baslıǵı A.Matlyubov, Qaraqalpaqstan Respublikası IIM Jınayat qıdırıw basqarması baslıǵı orınbasarı N.Adilbekov hám basqalar shıǵıp sóylep, jınayatshılıqtıń  unamsız aqıbetleri hám náshebentliktiń insan salamatlıǵına keri tásir kórsetiwshi illet ekenligine ayrıqsha toqtap ótti.

Ushırasıwda atap ótilgenindey, insan organizmi náshebentlik zatlardı qabıl etkennen keyin oǵan úyrenip qalıwı tábiyǵıy jaǵday. Ol AIJS, gepatit, tuberkulyoz sıyaqlı keselliklerdi keltirip shıǵaradı. Statistikalıq maǵlıwmatlarǵa qaraǵanda náshebentlik zatlardı qabıllaǵan hár bir adam bir jıl dawamında ortasha jeti, segiz adamdı óziniń qatarına qosadı eken. Sonlıqtan jaslardı jámiyetimizge jat bolǵan qáwiplerden qorǵaw, ana Watanǵa húrmet hám milliy qádiriyatlar ruwxında tárbiyalaw baslı wazıypalardan sanaladı. Bul baǵdarda jaslardıń bos waqıtların mazmunlı ótkeriwge qaratılǵan úgit-násiyat ilajların turaqlı túrde alıp barıwmız tiyis.

Ilaj sońında jaslardı sergeklikke shaqırıwshı «Wzini yuqatganlar» atlı hújjetli film qoyıp berildi.

ÓzMKÓMI Nókis filialı baspasóz xızmeti.