Ózbekstan mámleketlik kórkem óner hám mádeniyat institutı Nókis filialında «Rejissura hám aktyor sheberligi» kafedrası oqıtıwshısı, «Karakalpakstan Respublikasına xızmet kórsetken artist», belgili talant iyesi Bazarbay Nazarımbetovtıń 60 jasqa tolıwı múnásibeti menen ilaj shólkemlestirildi.   Onda Qaraqalpaqstan Respublikası Mádeniyat ministri Q.Turdiev, Qaraqalpaqstan Respublikası Xalıq bilimlendiriw ministri R.Reymov hám filial direktorı A.Ayapovlar shıǵıp sóylep, yubilyar iyesin qızǵın qutlıqlap, onıń kórkem óner hám mádeniyat tarawındaǵı kóp jıllıq miynet jolı, teatr ónerin rawajlandırıwdaǵı dóretiwshilik islerin jıynalǵanlarǵa atap ótti. Sonday-aq, ilajda B.Nazarımbetov Qaraqalpaqstan Respublikası Xalıq bilimlendiriw ministri R.Reymov tárepinen «Qaraqalpaqstan Respublikası Xalıq bilimlendiriw aǵlası» kókirek belgisi menen sıylıqlandı.

Ushırasıwda atap ótilgenindey, qaraqalpaq xalqı óziniń bay mádeniyatı hám ózine tán kórkem óneri menen basqa xalıqlardan ajıralıp turadı. Ótken dáwirler ishinde kórkem óner hám mádeniyat tarawın rawajlandırıwda xalqımız arasınan belgili aktyorlar, kórkem-óner ǵayratkerleri hám mádeniyat tarawı pidayıları jetilisip shıqtı. Bul jolda B.Nazarımbetovtıń xalqımızdıń biytákirar kórkem-óner hám teatr ónerin rawajlandırıwdaǵı úlesleri oǵada salmaqlı. Onıń teatr hám ekran ónerinde atkarǵan rolleri, dóretken obrazları xalqımızǵa keńnen tanıs. Tarawda atqarǵan xızmetleri Húkimetimiz tárepinen múnásip bahalanıp, «Karakalpakstan Respublikasına xızmet kórsetken artist» ataǵı menen sıylıqlanıwı mádeniyat hám kórkem óner jámááti, ásirese, xalqımız ushın úlken maqtanısh esaplanadı.

Óz gezeginde bizde B.Nazarımbetovtı 60 jıllıq yubileyi menen jáne bir márte qutlıqlap, bekkem densawlıq, shańaraǵında qut-bereket hám taraw sistemasında alıp barıp atırǵan iygilikli jumıslarında tasqın-tabıslar tileymiz!

ÓzMKÓMI Nókis filialı baspasóz xızmeti.