Ózbekstan mámleketlik kórkem óner hám mádeniyat institutı Nókis filialında 8-dekabr – Ózbekstan Respublikası Konstituciyası qabıl etilgen kún múnásibeti menen saltanatlı ilaj bolıp ótti.

Ózbekstan hám Qaraqalpaqstan Respublikalarınıń mámleketlik gimnleri menen baslanǵan ilajdı filial direktorı w.w.a Q.Yusupov basqarıp bardı.

Saltanatlı ilajǵa Qaraqalpaqstan Respublikası Prokraturası bólim baslıǵı Y.Erjanov, Qaraqalpaqstan Respublikası Sudı baslıǵınıń orınbasarı B.Qtaybekovlar, filial jámááti hámde student-jaslar qatnastı.

Ilajda shıǵıp sóylewshiler jıynalǵanlardı Ózbekstan Respublikası Konstituciyası qabıl etilgenine 33 jıl tolıwı menen qızǵın qutlıqlap, mámleketimizde nızam ústinligin támiyinlew, jaslardıń huqıqıy sawatlılıǵı jáne mádeniyatın arttırıw baǵdarında ámelge asırılıp atırǵan jumıslardıń áhmietine keńnen toqtap ótti.

Atap ótilgenindey, Konstituciya – hár bir mámlekettiń tariyxın, búgingi kúnin hám keleshegin, xalıqtıń erk-ıqrarın ózinde sáwlelendiriwshi tiykarǵı nızam bolıp esaplanadı.

Konstituciya ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıqları menen erkinlikleriniń isenimli qorǵalıwınıń kepili bolıp esaplanadı.

Elimizde nızam ústinligin támiyinlew arqalı puqaralıq jámietin qurıw, bunıń ushın xalqımızdıń huqıqıy mádeniyatın arttırıw, búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslar ayrıqsha atap ótildi.

Tiykarǵı nızamımızda keleshek áwladlardıń bilim alıwı, kásip mamanı bolıwı, ozıq-oylı, tereń pikirleytuǵın, jetik insan bolıp jetilisiwi ushın zárúr bolǵan principler hám qaǵıydalar belgilep berilgen. Sońǵı jılları joqarı bilimlendiriw sistemasına qaratılıp atırǵan itibar hám ǵamqorlıqlar usı maqsetlerge erisiw ushın xızmet etedi. Qaraqalpaqstanda sońǵı jılları joqarı oqıw orınlarınıń materiallıq-texnikalıq bazasınıń jaqsılanıwı, qabıllaw kvotaları sanınıń kóbeytiliwi, ásirese, bıyılǵı jılı da Qaraqalpaqstan jasların hár tárepleme qollap-quwatlaw maqsetinde qosımsha grant orınlarınıń berilgenligi Konstituciyada belgilengen normalardıń ámeldegi kórinisleri bolıp tabıladı.

Usınday imkaniyatlar nátiyjesinde elimiz jasları ilim, bilimlendiriw, mádeniyat, sport hám turmıstıń basqa da salalarında úlken tabıslardı qolǵa kirgizip kelmekte.

Saltanatlı ilaj filial student-jasları tárepinen tayarlanǵan koncert baǵdarlaması menen dawam etti.

Ilaj sońında bayram hám ilajlarda belsendi qatnasıp kiyatırǵan professor-oqıtıwshılar hám student-jaslar “Húrmet jarlıǵı” menen sıylıqlandı.