Qaraqalpaqstan Respublikası Mámleketlik gimni 1993-jıl 24-dekabr kúni Qaraqalpaqstan Respublikası Joqarǵı Keńesiniń XIV sessiyasında «Qaraqalpaqstan Respublikasınıń Mámleketlik gimni haqqında»ǵı Nızam qabıl etildi. Bıyıl Qaraqalpaqstan Respublikası mámleketlik gimniniń qabıl etilgenine 32 jıl toldı. Bayram ilajları respublikamızdıń barlıq orınlarında kóterińki ruwxta belgilenbekte.

Sáne múnásibeti menen Ózbekstan mámleketlik kórkem óner hám mádeniyat institutı Nókis filialında bayram ilajı bolıp ótti.

Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı.

Bunnan soń filial direktorı w.w.a Q.Yusupov, “Xalıq dóretiwshiligi” fakulteti dekanı Q.Turdievlar shıǵıp, sóylep, mámleketimiz nıshanları, sonıń ishinde, gimnniń áhmietine ayrıqsha toqtap ótti.

Ilajda atap ótilgenindey, hár bir mámlekettiń bayraǵı, gerbi, gimni — sol mámleket suverinitetiniń tımsalı bolıp esaplanadı. Usı mámleketlik nıshanlar arqalı biz ózligimizdi maqtanısh etemiz, erteńgi kúnge bolǵan isenimimizdi bekkemleymiz. Xalqımız ótmishin, milliy-mádeniy dástúrlerin, qádiriyatların, tınıshlıq hám milletleraralıq tatıwlıq sıyaqlı pazıyletlerdi ózinde jámlegen gimn ózligimizdi maqtanısh etiwde, jaslardı Watansúyiwshilik ruwxında tárbiyalawda, sonday-aq, olardıń hár tárepleme jetik insanlar bolıp jetilisiwinde tárbiyalıq áhmietke ie qural sıpatında xızmet etip kelmekte.

Maǵlıwmat ornında aytıp ótetuǵın bolsaq, mámleketlik gimnniń avtorı Ózbekstan qaharmanı Ibrayım Yusupovqa tiyisli bolıp, muzıkasın belgili kompozitor Nájimatdin Muhammeddinov tárepinen jazılǵan.