Aldın xabar bergenimizdey Ózbekstan mámleketlik kórkem óner hám mádeniyat institutı Nókis filiali hám Qazaqstan Respublikasınıń X.A.Yassawiy atındaǵı Xalıqaralıq Qazaq-Túrk universiteti ortasında 2021-jıldıń 12-dekabrinde dúzilgen Memprandumǵa tiykar 2022-jıldıń 5-10-noyabr kúnleri aralıǵında filialımızdıń “Xalıq dóretiwshiligi” kafedrasınıń professor-oqıtıwshıları G.Munteeva hám U.Abdullaevalar akademiyalıq tájiriybe almasıwda X.A.Yassawiy atındaǵı Xalıqaralıq Qazaq-Túrk universitetinde xızmet saparında bolıp qaytqan edi.

Xızmet saparınan baslı maqset – Xalıqaralıq Qazaq-Túrk universitetiniń “Vokal atqarıwshılıǵı” hám “Estrada atqarıwshılıǵı” tálim baǵdarları studentlerine Master-klass sabaqların ótiw,  óz qánigeligi boyınsha tájiriybe almasıw, ilimiy hám pedagogikalıq jumısları boyınsha izlenisler alıp barıwdan ibarat bolıp tabıladı.

Búgin X.A.Yassawiy atındaǵı Xalıqaralıq Qazaq-Túrk universitetine barıp tájiriybe almasıp qaytqan professor-okıtıwshılardıń qatnasıwında ushırasıw bolıp ótti.

Ushırasıwdı Kórkem ónertanıw fakulteti dekanı G.Xodjametova alıp bardı. Onda “Xalıq dóretiwshiligi” kafedrasınıń professor-oqıtıwshıları G.Munteeva hám U.Abdullaevalar shıǵıp sóylep, universitet turmısı hám tájiriybe almasıwdaǵı tásirlerin studentler menen bólisti. Akademiyalıq tájiriybe almasıwda qatnasıp qaytqan “Qosıq hám ayaq oyın” tálim baǵdarınıń 3-kurs studenti A.Quraqbaevta shıǵıp sóylep, sol jaqtaǵı teńlesleri menen sabaqlarǵa qatnasqanlıǵı, bilim hám tájiriybesin arttırıp qaytqanlıǵın atap ótti.

Ilaj sońında student-jaslar ózlerin qızıqtırǵan sorawlarına juwap aldı.

Filial baspasóz xızmeti.