Ózbekstan mámleketlik kórkem óner hám mádeniyat institutı Nókis filialı «Folklor hám etnografiya» kafedrası oqıtıwshısı Gulnara Allambergenova usı jıldıń 28-30-oktyabr kúnleri Qırǵızstan Respublikasınıń Bishkek qalasında ótkerilgen xalıqaralıq ilimiy-ámeliy konferenciyaǵa qatnastı.

Qırǵızstan xalıq artisti, Toktogul atındaǵı mámleketlik sıylıqtıń laureatı, kórkemónertanıw ilimleri doktorı, professor Roza Amanovanıń 50 jıllıq yubileyine arnalıp «Salttuu muzıkalıq madaniyat, aalamdashuu doorundaǵı eldik-professional muzıkanttardıń ortu» atamasında ótkerilgen xalıqaralıq ánjumanǵa Túrkiya, Qazaqstan, Tatarstan, Ózbekstan, Qaraqalpaqstan hám Altay Respublikalarınan xalıq saz-ásbapları sazendeleri, ansambller, baqsılar hám jırawlar, kórkem óner tarawı qánigeleri qatnastı.

Filialımızdıń «Folklor hám etnografiya» kafedrası oqıtıwshısı Gulnara Allambergenova xalıqaralıq konferenciya sheńberinde shólkemlestirilgen koncert, master klass sabaqları hám ilimiy konferenciyada belsendi qatnasıp, yubiley miymanlarına qaraqalpaq xalıq namaların atqarıp berdi. Sonday-aq, Qırǵızstan xalıq artisti, Toktogul atındaǵı mámleketlik sıylıqtıń laureatı, kórkemónertanıw ilimleri doktorı, professor Roza Amanovanı filialımız jámááti atınan 50 jıllıq yubileyi menen qutlıqlap, Roza Amanova dóretiwshiligine arnalǵan muzeyge qaraqalpaq xalqınıń alamoynaq duwtarın sawǵa etti.