Qaraqalpaqstan Respublikası Mádeniyat ministri B.Temirbaev Ózbekstan mámleketlik kórkem óner hám mádeniyat institutı Nókis filialında bolıp, filial jasları menen ushırastı.

«Ministr hám jaslar» atamasında ótkerilgen ushırasıw keshesine filial direktorı A.Ayapov, filialdıń «Xalıq dóretiwshiligi» fakul’teti dekanı Q.Turdiev penen birge professor- oqıtıwshılar hám student jaslar qatnastı.

Ilajda sózge shıqqanlar mámleketimizde jaslar máselesi mámleketlik siyasattıń aldıńǵı baǵdarlarınıń biri ekenligin, mámleketimizde jaslarımızdı hár tárepleme qollap-quwatlaw, olardıń qábiletlerin júzege shıǵarıw, huqıq hám erkinliklerin qorǵaw baǵdarında jaratılǵan sharayatlar haqqında keńnen sóz etti.

Búgin sizler menen ushırasıwdaǵı tiykarǵı maqsetimiz de elimizdiń múnásip perzentleri bolıp jetilisiwińiz jolında ámelge asırılıw kerek bolǵan jumıslarda sizlerdiń de ornıńız ayrıqsha ekenligin atap ótiw menen birge, sizlerdiń pikir hám usınıslarıńızdı, baslamalarıńızdı qollap-quwatlaw, bar mashqalalardı saplastırıw bolıp tabıladı-dedi ministr Begisbay Temirbaev.

Álbette, hár qanday mámlekettiń rawajlanıwı, tabıslarǵa erisiwi, xalıqtıń abadan turmıs keshiriwi sol mámlekette jaslardıń tálim-tárbiyası hám keleshegine qaratılǵan itibarǵa baylanıslı. Mádeniyat hám kórkem ónerdiń túrli baǵdarlarında joqarı maǵlıwmatlı qánigelerdi tárbiyalawda xızmet etip atırǵan Ózbekstan mámleketlik kórkem óner hám mádeniyat institutı Nókis filialında da jaslarımız ushın úlken imkániyatlar jaratılǵan. Bunı biz sońǵı waqıtları filial jaslarınıń respublikalıq hám xalıqaralıq tańlaw, festivallarında qolǵa kiritip atırǵan tabısları mısalında da kóriwimizge boladı.

Ótkerilgen ushırasıwda jaslar óz pikir-usınısların bildirip, talantlı jaslardı júzege shıǵarıw, olardıń dóretiwshiligin qollap-quwatlaw boyınsha isleniwi tiyis bir qatar wazıypalar belgilep alındı.