Shıǵıs xalqınıń oyanıw pasılı bolǵan «jańa kún», «jańa jıl» Nawrız bayramı bıyılda úlkemizge qutlı qádem qoymaqta. Jańalanıw hám jasarıw áyyamı bolǵan Nawrızdı xalqımız kún menen túnniń teńlesiwi, tábiyattıń oyanıwı sıpatında keń túrde belgilep keledi. Bıyılǵı Nawrız bayramı elimizde «Álem nurǵa tolsın sen menen Nawrız» súreni astında ulıwmaxalıqlıq seyil tárizinde kóterińkilik jaǵdayında belgilenbekte.

Úsh mıń jıldan artıq tariyxqa iye bolǵan Nawrız bayramı Shıǵıs xalqınıń oyanıw pasılı, báhár ayyamınıń kirip keliwi, ana tábiyatımız kókke enip, ókpe-geyneler keshirilip, hár bir shanaraqqa kuwanıshlı máwritlerdi alıp keliwi menen birge, ózinde milliy úrp-ádet dástúrlerimizdi jámlegeni menen biz ushın qádirli bolıp tabıladı. 

Búgin Ózbekstan mámleketlik kórkem óner hám mádeniyat institutı Nókis filialında teatrlastırılǵan bayram keshesi bolıp ótti. Bayram ilajında filial direktorı A.Ayapov shıǵıp sóylep, jıynalǵanlardı báhár ayyamı – Nawrız bayramı menen qızǵın qutlıqladı.

Álbette usınday ashıq aspan, tınıshlıq húkimranlıq súrip turǵan ana diyarımızǵa bayramlar jarasadı. Sońǵı jılları elimizde húrmetli Prezidentimizdiń basshılǵında sociallıq-ekanomikalıq turmısımızdıń baralıq tarawlarında túpkilikli reformalar ámelge asırılıp, sonıń ishinde bilimlendiriw tarawınada jaslarımızdıń oqıp bilim alıwı ushın barlıq múmkinshilikler jaratıp berilmekte. Bul baǵdardaǵı jumıslardıń ámeliy kórinisi sıpatında bıyılǵı oqıw jılında jaslarımız ushın qosımsha kvotalardıń ajıratılıwı, dástanshılıq, baqsıshılıq tálim baǵdarına qabıl etilgen studentlerdiń, sonday-aq, magistratura basqıshında oqıp atırǵan hayal-qızlarımızdıń shártnama tólemleri mámleketimiz tárepinen tólep berilmekte.

Sonı ayrıqsha atap ótiwmiz tiyis, bıyılǵı 2023-2024-oqıw jılında filialımızda ruwxıy-aǵartıwshılıq hám ilimiy iskerlik baǵdarında nátiyjeli jumıslar ámelge asırılıp, bir qatar tabıslar qolǵa kirgizildi. Mine solardıń ishinde ilimiy iskerlik baǵdarındaǵı jumıslardı atap ótetuǵın bolsaq, 7 oqıtıwshımız professor ilimiy ataǵın, 11 oqıtıwshımız docent ilimiy ataǵın alıwǵa miyasar boldı. Sonday-aq, 5 studenttimiz mámleketlik stipendiya jeńimpazı bolǵan bolsa, basqada jaslarımız ilim-bilimlendiriw hám kórkem ónerge baǵdarlanǵan respublikalıq hám xalıqaralıq tańlawlarda múnásip qatnasıp, joqarı tabıslardı qolǵa kirgizip kelmekte.

Álbette, bul jetiskenlikler, qolǵa kirgizgen tabıslar mámleketimiz tárepinen jaratıp berilgen imkaniyatlar, mine usı imkaniyatlardan nátiyjeli paydalanıp, jaslarımızdıń ustazlar isenimin aqlap, joqarı jetiskenliklerge erisiwi jámáátimiz ushın úlken maqtanısh esapnalandı.

Bayram ilajında «Tumar» ansambli hám student-jaslar tárepinen tayarlanǵan koncert baǵdarlaması jıynalǵanlar názerine usınıldı. Bayram tamashaları dawamında milliy sport oyınları bolǵan arqan tartısıw, tas kóteriw hám qol gúresi sıyaqlı oyınlar ótkerilip, jeńimpazlar sıylıqlandı.

Kóterińki ruwxta ótkerilgen bayram ilajında student-jaslar ózleri tayarlaǵan hár qıylı milliy taǵamlarımızdı, ata-babalarımızdan qalǵan úy buyımların ákelip kórgizbede usındı. Sonday-aq, jámáát xızmetkerleri hám student-jaslar jaqsı tileklerin bildirip, súmelekten dám tarttı. 

Ashıq aspan astında ótkerilgen teatrlastırılǵan koncert baǵdarlaması bársheniń kewiline yosh hám joqarı keypiyat inam etti.

Abdiqadir Orazov.