SAZIN SAMAL YADLAP, SÓZIN EL BILGEN ShAYIR
Hár qanday xalıqtıń belgili bir zamanlarında onıń kewil dártlerin iláhiyda sóz sheberligi menen jırlawshı, onıń muńların qosıqları menen jetkerip beretuǵın shayırı boladı. Usınday qaraqalpaq xalqınıń XIX ácirdegi klassik shayırı, aǵartıwshı hám baqsı Ájiniyaz Qosıbay ulınıń tuwılǵanına bıyıl 200 jıl toladı.
Sonlıqtan da, húrmetli Prezidentimizdiń baslaması menen Ájiniyazdıń 200 jıllıǵı YUNESKO sheńberinde xalıqaralıq kólemde belgilenetuǵın belgili sáneler qatarına kirgizildi.
Usı jıldıń 19-aprel kúni Berdaq atındaǵı Qaraqalpaq ádebiyatı tariyxı mámleketlik muzeyinde Ájiniyaz shayırdıń 200 jıllıǵına baylanıslı «Sazın samal yadlap, sózin el bilgen shayır» atamasında ádebiy keshe shólkemlestirildi.
Kesheni muzey direktorı Sh.Payzullaeva basqarıp bardı.
Ilajda QMU docenti P.Allambergenova, NMPI docenti Q.Matimov, Ózbekstan Mámleketlik kórkem óner hám mádeniyat institutı Nókis filialı docentleri A.Prekeeva hám I.Moyanovlar ózleriniń bayanatları menen qatnastı. Sonday-aq filialdıń «Texnogen hám kórkemónertanıw» fakulteti dekan orınbasarı G.Payzullaeva hám student-jaslar belsene qatnastı.
Bayanatshılardıń atap ótkenindey, Ájiniyaz Qosıbay ulı dún’yanı tereń hám ótkir tanıp, qaraqalpaq xalqınıń ruxıy dún’yasınıń bayıwına úles qosqan, ádebiyatımızdı rawajlandırıp ǵana qoymastan, qońsılas xalıqlarǵa tanıstırǵan ullı tulǵa bolıp tabıladı. Ol qaraqalpaq poeziyasın rawajlandırıw menen birge, aytıs janrınıń da dóretiwshisi bolıp tabıladı. Onıń Qız Meńesh penen aytısı shayırlar aytısınıń eń jaqsı úlgisi bolıp esaplanadı.
Keshede shayır dóretiwshiligin xalıqaralıq kólemde úgit-násiyatlaw, shıǵarmaların shet tillerine awdarıw, sonıń menen birge, dóretpeleriniń jańa qırların ashıw maqsetinde ilim-izertlew jumısların alıp barıw sıyaqlı máseleler boyınsha pikir-usınıslar berildi. Sonday-aq, shayırdıń yubileyi múnásibeti menen onıń maqbarasın zıyaratlaw, abadanlastırıw jumısların ótkeriw, shıǵarmaların xalqımız, ásirese, jaslar arasında keń úgit-násiyatlaw jumısların alıp barıw wazıypaları belgilep alındı.
Keshe sońında «Qaraqalpaqfil’m» tárepinen súwretke alınǵan «Ziyўar», «Ziyўardıń shiyrin zibanı» atlı hújjetli fil’mler qoyıp berildi hám respublikamızdıń joqarı oqıw orınları student-jasları tárepinen Ájiniyaz shayırdıń dóretiwshiliginen tayarlaǵan nama qosıqları atqarıldı. Ásirese, Berdaq atındaǵı Qaraqalpaq mámleketlik akademiyalıq muzıkalı teatrınıń aktyorı B.Abdenovtıń atqarǵan Ájiniyaz shayır obrazı qatnasıwshılarda ózgeshe tásir qaldırdı.
