Hár bir mámlekettiń bayraǵı, gerbi, gimni — sol mámleket suverinitetiniń tımsalı bolıp esaplanadı. Usı mámleketlik nıshanlar arqalı biz ózligimizdi maqtanısh etemiz, erteńgi kúnge bolǵan isenimimizdi bekkemleymiz. Ózinde milliy-mádeniy dástúrlerdi jámlegen bayraq elimiz delegaciyalarınıń sırt ellerge saparı waqtında, xalıqaralıq maydanlardaǵı túrli ilajlarda, sport jarıslarında elimizdiń tımsalı  sıpatında bálent jelbirep kelmekte.

Bıyıl Ózbekstan Respublikası Mámleketlik bayraǵınıń qabıl etilgenligine 34 jıl toldı. Sáne múnásibeti menen Ózbekstan mámleketlik kórkem óner hám mádeniyat institutı Nókis filialı tárepinen Qaraqalpaq mámleketlik Jas tamashagóyler teatrında bayram shólkemlestirildi.

Onda Qaraqalpaqstan Respublikası Mádeniyat ministri B.Temirbaev, Ózbekstan mámleketlik kórkem óner hám mádeniyat institutı rektorı, professor B.Sayfullaev, professor-oqıtıwshılar, filial jámááti hám student-jaslar qatnastı.

Dáslep, Ózbekstan hám Qaraqalpaqstan Respublikasınıń gimnleri jańladı. Bunnan soń, filial direktorı w.w.a Q.Yusupov, shayır, qıssaxan hám jurnalist Xalila Dáwletnazarov, Berdaq atındaģı Qaraqalpaq mámleketlik universiteti yuridika pánlri boyınsha felosofiya doktorı, PhD Sh.Burxanovalar shıǵıp sóylep jıynalǵanlardı búgingi bayram menen qutlıqladı.

Ilaj filialdıń professor-oqıtıwshıları hám student-jasları tárepinen shólkemlestirilgen koncert baǵdarlaması menen dawam etti.