«Nawayı kán-metallurgiya kombinatı» akcionerlik jámiyeti jasları hám Nawayı mámleketlik kánshilik hám texnologiyalar universiteti student-jasları Aral teńizi aymaǵında seksewil nállerin otırǵızıw eko akciyasında qatnasıw ushın Moynaq rayonında boldı.

Dáslep miymanlardı rayon hákimligi hám basqa da jámiyetlik shólkem wákilleri joqarı dárejede kútip aldı. Onda rayon hákiminiń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı M.Jumabaev, Jaslar isleri agentliginiń rayonlıq bóliminiń baslıǵı P.Umrzakov hám Ózbekstan mámleketlik kórkem óner hám mádeniyat institutı Nókis filialı direktorı K.Yusupovlar shıǵıp sóylep, ekologiyallıq turaqlılıqtı jaqsılıw baǵdarında júrgizilip atırǵan jumıslarǵa óz úleslerin qosıwǵa kelgen jaslarǵa bul iygilikli islerine tabıslar tiledi.

Sonday-aq, ilajda «Nawayı kán-metallurgiya kombinatı» akcionerlik jámiyeti qáwendirliginde baspadan shıǵarılǵan moynaqlı dóretiwshi jaslardıń dóretpeleri orın alǵan «Araldıń asaw tolqını» atamasındaǵı qosıqlar toplamı hám A.Nawayı shıǵarmaları orın alǵan ádebiy kitap rayon hákimligine sawǵa sıpatında tapsırıldı.

Bunnan soń, kárxana jasları Aral teńizi aymaǵında seksewil nállerin otırǵızıw jumısların baslap jiberdi.