Talaba_yoshlar_ijodiyoti_kórik_festivali

Xabarıńız bar usı jıl 2-5-iyun kúnleri tayanısh oqıw ornı bolǵan Ózbekstan mámleketlik kórkem óner hám mádeniyat institutında «Student-jaslar dóretiwshiligi» atamasında festival bolıp ótti.

Hár jılı ótkeriliwi dástúrge aylanǵan bul festivalda student-jaslar ózleriniń dóretiwshilik qábileti, ilimiy izlenisleri hám kórkem ónerge bolǵan qızıǵıwshılıǵın jáne bir márte kórsetiwge miyasar boldı. Festival sheńberindegi ilajlarda Ózbekstan mámleketlik kórkem óner hám mádeniyat institutı Nókis filialınıń student-jasları da óz dóretpeleri menen qatnastı.

Keshe 5-iyun kúni festival sheńberinde ótkerilgen tańlawlarda jeńimpaz bolǵanlardı sıylıqlaw máresimi bolıp ótti. Onda institut rektorı, professor N.Sayfullaev shıǵıp sóylep, pitkeriwshi student-jaslardı qutlıqlap, keleshekte elimiz rawajlanıwı jolında xızmet etetuǵın jetik qánigeler bolıp jetilisiwine hám festival sheńberindegi ilajlarda jeńimpaz bolǵan jaslarǵa aldaǵı dóretiwshilik jumıslarında tabıslar tiledi.

Bunnan soń festival dawamında oqıw, ilimiy, dóretiwshilik hám jámiyetlik jumıslarda joqarı nátiyjelerge erisken studentler, magistrantlar, doktorantlar hám institut penen nátiyjeli birge islesiwdi jolǵa qoyǵan shólkemlerdiń wákillerinen ibarat jámi 59 qatnasıwshı 35 nominaciya boyınsha sıylıqlandı.

Sıylıqlanǵanlar qatarında filial direktorı K.Yusupov «Jıldıń eń jaqsı kórkem óner hám mádeniyat úgit-násiyatlawshısı» nominaciyası boyınsha diplom hám bahalı sawǵa menen sıylıqlanadı.

Sonday-aq, «Rejissyor kórkem óneri» kafedrası «Estrada hám ǵalabalıq tamashalar rejissyorlıǵı» tálim baǵdarınıń pitkeriwshisi A.Bazarbaevanıń «Hellados» spektakli bolsa «Jıldıń eń jaqsı jámáátlik dóretiwshilik jumısı» nominaciyası boyınsha jeńimpaz dep tabılıp, diplom hám bahalı sawǵalar menen sıylıqlanadı.

Biz de óz gezeginde jeńimpaz iyelerin filial jámááti atınan qızǵın qutlıqlap, aldaǵı dóretiwshilik jumıslarında bálent párwaz tileymiz.

Filial baspasóz xızmeti.