Búgin Qaraqalpaq mámleketlik Jas tamashagóyler teatrında qaraqalpaq kórkem óneri hám mádeniyatınıń jankúyeri, teatr sınshısı, dramaturg, professor Jabbarbergen Xojanovtıń 70 jıllıq yubileyine baǵıshlanǵan «Qaraqalpaq dramaturgiyası: keshe, búgin, erteń» atamasındaǵı Respublikalıq ilimiy-ámeliy konferenciya bolıp ótti.
Konferenciyaga respublikamızǵa belgili kórkem óner hám mádeniyat tarawınıń wákilleri, professor-oqıtıwshılar, jas izleniwshiler, magistrantlar hám student-jaslar qatnastı.
Ilajdı filial direktorı K.Yusupov kiris sóz benen ashtı hám J.Xojanovtıń qaraqalpaq kórkem óneri hám mádeniyatı, sonday-aq, ilim-bilimlendiriw tarawına qosıp atırǵan dóretiwshilik miynetlerin ayrıqsha atap ótti.
Bunnan soń, Qaraqalpaqstan Respublikası Mádeniyat ministriniń birinshi orınbasarı B.Xudayshukurov, Ózbekstanǵa miyneti sińgen kórkem óner ǵayratkeri N.Muxamatdinov, Ózbekstan xalıq artisti, Ózbekstanǵa miyneti sińgen jaslar ustazı, professor N.Ańsatbaev, Qaraqalpaqstan xalıq jazıwshısı M.Nızanov hám basqalar shıǵıp sóylep, yubilyar iyesiniń ómiri hám onıń aǵla pazıyletlerin, sonday-aq, dóretiwshilik jolındaǵı miynetlerin tilge alıp ótti.
Ilajda atap otilgenindey, J.Xojanov óziniń ayrıqsha talantı, bay dúnyaqarası menen xalqımızdıń biytákirar kórkem óner hám mádeniyatın, sonıń ishinde ádebiyat, teatr hám dramaturgiya kórkem óneriniń rawajlandırıwda ornı salmaqlı. Ol dóretiwshiligi dawamında onnan artıq pesalar dóretip, sonıń menen birge, «Párwaz» hám «Alıs planetadaǵı qısqa waqıt» atlı fantastikalıq povestleri baspadan shıqtı.
J.Xojanov kórkem óner hám mádeniyat tarawınıń rawajlanıwı jolında xızmet etip qoymastan, búgingi kúnde ilim hám bilimlendiriw tarawında jaslarǵa ustazlıq etip, onnan artıq oqıw qollanba hám 50 den aslam ilimiy maqalaları baspadan shıqtı. Álbette, bul ilimiy miynetler tarawdıń alǵa ilgerlewinde, sonday-aq, filialda bilim alıp atırǵan jaslardıń teoriyalıq bilimin jetilistiriwde áhmiyetli sanaladı.
Konferenciya filial student-jasları tárepinen tayarlanǵan koncert baǵdarlaması menen dawam etti.
Filial baspasóz xızmeti.
