Paytaxtımız Nókis qalasında «II Xalıqaralıq baqsıshılıq kórkem óneri festivalı» kóterińki ruwxta ótkerildi.

Festival sheńberinde baqsı, jıraw hám aqınlar túrli nama hám dástanlar atkarıp, ózleriniń atqarıw sheberliklerin kórsetip, qatnasıwshılarda ayrıqsha tásir qaldırmaqta. On eki mámleketten 20 dan aslam baqsı, jırawlar qatnasqan tańlawda Qaraqalpaqstan Respublikasınan úsh qatnasıwshınıń bolıwı, sonıń ishinde Ózbekstan mámleketlik kórkem óner hám mádeniyat institutı Nókis filialı «Xalıq dóretiwshiligi» kafedrası docenti, Qaraqalpaqstan xalıq baqsısı, «Doslıq» ordeni iyesi G.Axımbetovanıń da qatnasıwı jámáátimiz ushın úlken maqtanısh esaplanadı.

Búgin festivaldıń juwmaqlawshı gala-koncertinde jeńimpazlardı sıylıqlaw máresmi bolıp ótti. Onda G.Axımbetovanıń atqarǵan «Góruǵlı» dástanı tóreshiler tárepinen joqarı bahalanıp, ekinshi orındı iyeledi, diplom hám aqshalay sıylıq penen sıylıqlandı.

Jeńimpazdı jámáátimiz atınan qutlıqlap, aldaǵı dóretiwshilik jumıslarında tabıslar tileymiz.

ÓzMKÓMI Nókis filialı baspasóz xızmeti.