Gúz-qıs máwsiminiń keliwi, hawa rayınıń suwıtıwına baylanıslı turaq-jay hám imaratlardı jılıtıw mapazı baslandı. Bul baǵdarda qalalıq Ayrıqsha jaǵdaylar bólimi tárepinen tiyisli tártipte is-ilajlar islep shıǵılıp, mákeme, kárxanalarda, oqıw orınları, mektepke shekemgi bilimlendiriw mákemelerinde hám puqaralardıń turaq jaylarında iyis gazinen záhárleniwdiń hám ayrıqsha jaǵdaylardıń, órtlerdiń aldın alıw boyınsha úgit-násiyat jumısları alıp barılmaqta.

     Usınday ilajlardıń biri usı Ózbekstan mámleketlik kórkem óner hám mádeniyat institutı Nókis filialında bolıp ótti. Ilajda Nókis qalası Ayrıqsha jaǵdaylar bólimi qánigeleri Z.Vaysov hám P.Qurbanovlar jıynalǵanlarǵa órt qáwipsizligi, iyis gazinen saqlanıw boyınsha keń túrde túsinik berdi.

     -Aytıp ótiw orınlı házirgi waqıtta respublikamız aymaǵında iyis gazinen záhárleniw menen baylanıslı unamsız jaǵdaylar ushıraspaqta — deydi Nókis qalası AJB qánigesi Z.Vaysov. – Puqaralarımız jılıtıw hám elektr úskeneleri, qazanxanalar hám gaz úskenelerin itibarsız qaldırmaǵanı maqsetke muwapıq boladı. Itibarsızlıqtıń aqıbeti salamatlıǵımız, úy-jayımız, múlklerimizge úlken zıyan jetkeriwi múmkin.

      Ushırasıwda student jaslar órt qáwipsizligi, iyis gazinen saqlanıw boyınsha ózleriniń qızıqtırǵan sorawlarına juwaplar aldı.

ÓzMKÓMI Nókis filialı baspasóz xızmeti.