Ózbekstan mámleketlik kórkem óner hám mádeniyat institutı Nókis filialı tárepinen Qaraqalpaq mámleketlik jas tamashagóyler teatrında «Ózbekstan-ulıwma úyimiz» súreni astında «Doslıq hám mádeniyat» atamasında ilaj ótkerildi.
Oǵan respublikamızdaǵı barlıq milliy mádeniy oraylarınıń wákilleri hám student-jaslar qatnastı.
Dáslep «Ózbekstan — keńpeyil úlke» atamasında foto-kórgizbesi shólkemlestirildi.
Bunnan soń, filial direktorı A.Ayapov, Nókis qalası hákimliginen N.Qudaybergenov hám Ǵ.Oralbaevlar shıǵıp sóylep, elimizde milletleraralıq tatıwlıq, doslıqtı bekkemlew baǵdarında nátiyjeli jumıslar alıp barılıp atırǵanlıǵın ayrıqsha atap ótti.
Ilajda atap ótilgenindey, búgingi kúnde mámleketimizde milletleraralıq tatıwlıqtı bekkemlew, milliy mádeniy oraylar menen islesiwdi jáne de rawajlandırıwǵa baǵdarlanǵan kólemli jumıslar ámelge asırılmaqta.
Házirgi kúnde mámleketimizde 130 dan aslam hár qıylı millet wákilleri bir atanıń balalarınday tatıw hám awızbirshilikte jasap, miynet etip etpekte. Elimizde jasaytuǵın hár qıylı millet hám xalıqlardıń úrp-ádetlerine húrmet penen qaraw, hár bir milletke tiyisli bayramlardı keń túrde belgilewge ayrıqsha kewil qaratılǵan. Bul baǵdarda mámleketimizde túrli millet wákilleriniń óz ana tili, kórkem óner hám mádeniyatı, milliy qádiriyatların rawajlandırıwda 150 ge jaqın mádeniy oraylar nátiyjeli jumıs alıp barmaqta. Házirgi kúnde Qaraqalpaqstanda Rus, Ukrain, Qazaq hám Túrkmen milliy mádeniy orayları jáne Koreysler assotsiatsiyasınıń jumısı jolǵa qoyılǵan. Sonı ayrıqsha atap ótiwmiz kerek, kóp milletli xalqımız bir maqset, bir ideya jolında birlesip, elimiz rawajlandırıwı jolında miynet etip atırǵanlıǵın maqtanısh penen tilge alsaq arzıydı.
Ilajda «Tumar» ayaq oyın ansamli hám talantlı jaslar tárepinen tuwısqan xalıqlardıń milliy qosıq hám ayaq oyınları atqarılıp keshe qatnasıwshılarına ózgeshe zawıq baǵıshladı.
Ilaj sońında filial direktorı A.Ayapov milliy mádeniy oraylarınan kelgen miymanlarǵa sawǵalar tapsırıp, ilaj shólkemlestiriwshilerine óz minnetdarshılıǵın bildirdi.
ÓzMKÓMI Nókis filialı baspasóz xızmeti. филиалы баспасөз хызмети.
