Usı jıl 2-fevral kúni Ózbekstan mámleketlik kórkem óner hám mádeniyat institutı Nókis filialında «Jaslar arasındaǵı náshebentlik zatlardıń tarqalıwına qarsı gúresiw» atamasında profilaktika aylıǵı sheńberinde ushırasıw bolıp ótti.

Oǵan jaslar awqamı jetekshileri, ruwxıy-aǵartıwshılıq bólimi xızmetkerleri, student jaslar hám huqıq qorǵaw uyımı xızmetkerleri qatnastı.

Májilisti Jaslar  máseleleri hám  ruwxıy-aǵartıwshılıq isleri boyınsha direktor orınbasarı A.Ótepbergenov basqarıp bardı hám  ótkerilip  atırǵan ilajdıń áhmiyetine ayrıqsha toqtap ótti.  

Bunnan soń,  Ózbekstan Respublikası Ishki isler ministrligi jınayat qıdırıw  bas basqarması bólim baslıǵı, podpolkovnik A.Matlyubov hám usı basqarmanıń xızmetkeri podpolkovnik F.Azgarov, Qaraqalpaqstan Respublikası Narkologiya dispanseri shıpakeri A.Samarkanova, Nókis qalası Muxammed Baxi iyshan Jome meshiti imam xatibi Sh.Xudaybergenov, hám Qaraqalpaqstan Respublikası AIJSǵa qarsı gúresiw orayı shıpakerleri A.Nazarbaeva hám M.Bekniyazovalar shıǵıp sóylep, náshebentlik hám AIJS kesselliginiń unamsız aqıbetleri, onıń insan salamatlıǵına, keleshek áwladtıń ósip rawajlanıwıwa keri tásir kórsetiwshi illet ekenligi haqqında maǵlıwmat berip ótti.

Ilajda jaslardıń bunday jat illetlerden awlaq bolıwında bos waqıtların mazmunlı ótkeriw, sonday-aq, pikirlew hám ruwxıy dúnyasın jetilistiriwde kóbirek ádebiy kitaplar oqıw, sport penen shuǵıllanıw kerekligi boyınsha túsinikler berildi.

Álbette, elimizdiń gúllep rawajlanıwı jaslar keleshegi menen baylanıslı eken, olardı sergeklikke shaqırıw, ana Watanǵa húrmet hám milliy qádiriyatlar ruwxında tárbiyalawday iygilikli islerde bárshemiz teńdey juwapkermiz. Sonlıqtan náshebentlik hár birimizdiń shańaraǵımız, jaqınlarımız hám ósip kiyatırǵan jas áwladqa qáwip salıwshı illet ekenligin umıtpawımız tiyis.

Ilaj sońında student-jaslar ózlerin qızıqtırǵan sorawları boyınsha qánigelerge múrájat etip, tiyisli juwap aldı.

Filial baspasóz xızmeti.