Өзбекстан мәмлекетлик көркем өнер ҳәм мәденият институты Нөкис филиалында Өзбекстандағы Уллы Британия Кеңесиниң «Креатив Спарк» жойбары шеңберинде «Мәденият ҳәм көркем өнер тараўында социаллық жойбарларға қаржы табыўдағы сырт ел тәжирийбеси» атамасында семинар-тренинг өткерилгенлиги ҳаққында хабар берген едик.

Семинардың екинши күнинде жойбар тринерлери Өзбекстан мәмлекетлик көркем өнер ҳәм мәденият институты доценти Манзура Юлдашева, усы институттың аға оқытыўшылары Бахтиёр Салайдинов ҳәм Айбек Дўсмухаммедовлар мойнақ районында болды.

Мийманлар Арал теңизи тарийхы музейинде болып, ол жерде Арал теңизиниң кешеги ҳәм бүгинги көринислери, балық консерва заводының турмысы, ҳайўанат дүньясы ҳәм басқа да көплеген экспонатлар  менен танысты. Сондай-ақ, Өзбекстан мәмлекетлик көркем өнер ҳәм мәденият институты ҳәм оның Ферғана аймақлық ҳәм Нөкис филиаллары тәрепинен шөлкемлестирилген «Қоқан бағын» тамашалады.

Илажда Мәденият ҳәм китапхана искерлиги кафедрасы баслығы Гүлшира Сапарбаева ҳәм Социал-гуманитар пәнлер кафедрасы оқытыўшысы Султан Кожалепесовлар қатнасты.

Филиал баспасөз хызмети.