15-май Халықаралық шаңарақ күни
Шаңарақлар татыўлығы ҳәм беккемлигине ерисиў мақсетинде БМШ Бас Ассамблеясы 1993-жыл 20-сентябрьдеги жыйналысында 15-майды ҳәр жылы «Халықаралық шаңарақ күни» ретинде белгилеў ҳаққында қарар қабыл етти. Соннан берли пүткил дүньяда, соның ишинде елимизде де 15 май «Халықаралық шаңарақ күни» сыпатында кең түрде белгиленип келинеди.
Сәне мүнәсибети менен Қарақалпақстан Республикасы Шаңарақ ҳәм ҳаял-қызлар комитети тәрепинен өткерилген «Жаңа Өзбекстанның үлгили шанарағы» таңлаўында Өзбекстан мәмлекетлик көркем өнер ҳәм мәденият институты Нөкис филиалы «Техноген ҳәм драматургия көркем өнери» кафедрасы баслығы, пайтахтымыздағы 37-санлы «Жуўазшы» мәкан пуқаралар жыйыны аймағында жасаўшы Караматдин Заретдиновтың шаңарағы «Спорт сүйер шаңарақ» номинациясы бойынша жеңимпаз болды.
Үлгили ҳәм спорт сүйер шаңарақ ийлерин жәмәәтимиз атынан қутлықлап, шанарағына аман-есенлик, татыўлық ҳәм беккем денсаўлық тилеп қаламыз.
Мағлыўмат ушын атап өтиўимиз тийис, Заретдиновлар шанарағы Нөкис қаласы ҳәкимлиги шаңарақ ҳәм ҳаял-қызлар бөлими тәрепинен шанарақта тыныш-татыў жасап атырған, үлгили шаңарақлар арасында өткерилген таңлаўда «Жаңа Өзбекстанның үлгили шанарағы» номинациясы бойынша да жеңимпаз болған еди.
Филиал баспасөз хызмети.
