Elimizdiń barlıq aymaqlarında jańa oqıw jılınıń baslanıwı múnásibeti menen ilajlar ótkerilmekte. Mine, búgin usınday ilajlardıń biri Ózbekstan mámleketlik kórkem óner hám mádeniyat institutı Nókis filialında bolıp ótti.

Oǵan baslanıp atırǵan oqıw jılında institutqa studentlikke qabıl etilgen jaslar, olardıń ata-anaları, professor-oqıtıwshılar, fakultet dekanları, tyutorlar qatnastı.

Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.

Bunnan soń Dáslep Qaraqalpaqstan Respublikası Mádeniyat ministriniń birinshi  orınbasarı B.Allakov, filial direktorı w.w.a Q.Yusupov, professor M.Ismaylova,  ata-analar hám student-jaslar  shıǵıp sóylep, jıynalǵanlardı Ózbekstan Respublikası ǵárezsizliginiń 34 jıllıq bayramı, taza oqıw jılınıń baslanıwı, sonday-aq, bıyıl qabıl etilgen jaslardı student bolıw baxtına ersikeni menen qızǵın qutlıqladı.

Ilajda atap ótilgenindey, sońǵı jılları elimizde ámelge asırılıp atırǵan reformalar, sonıń ishinde bilimlendiriw tarawında júrgizilip atırǵan jumıslar, sonday-aq, jaslar ushın  jaratılǵan imkaniyatlardı ayrıqsha atap ótti. Búgingi kúnde filialda eki mıńģa shamalas jaslarımız kúndizgi hám sırtqı, sonday-aq, magistratura qánigeliklerinde bilim almaqta. Sonıń ishinde bıyılǵı oqıw jılında kúndizgi tálim baǵdarına 278 student, magistratura qánigeligine bolsa, 36 magistrant qabıl etildi.

Sonı ayrıqsha atap ótiwimiz kerek, filialda bilim alıp atırǵan jaslarımız ilim-bilimlendiriw tarawında joqarı nátiyjelerge erisiw menen birge, úlken saxnalarda óz talantların kórsetip, ustazlar isenimin aqlap, xalqımızdıń alǵısına miyasar bolıp kelmekte. Álbette, bulardıń barlıǵı mámleketimizde jaslar ushın jaratılǵan imkaniyatlar nátiyjesi bolıp, elimizde bilimlendiriw tarawına qaratılıp atırǵan jumıslar jaslardıń keleshekte ozıq oylı, maman kadrlar bolıp jetilisiwinde óziniń unamlı nátiyjesin kórseteri anıq.

Ilaj ǵárezsizlik sabaǵı menen dawam etti.