Filialımızdıń “60211000-Kórkemónertanıw (kino kórkem óneri hám analizi)” tálim jónelisi 2-kurs studenti Turǵanbaev Anvar Evropa mámleketlerinde jazǵı demalıs waqtında jumıs islew hám sayaxat etiw imkaniyatın beretuǵın “Work & Travel” baǵdarlamasına hújjet tapsırıp, 2025-jıldıń iyun-avgust aylarında Germaniyanıń Drezden qalasında awıl-xojalıq jumıslarında islew ushın barıp qayttı.

Anvar Germaniyada ótkergen 3 ay dawamında nemis xalqınıń mádeniyatı, jasaw tárizi, tariyxıy orınlarında bolıp, qosımsha dáramat tabıw menen birge Germaniya boylap sayaxat etiw imkaniyatına da iye boldı. Usınday sayaxatları waqtında studentimiz Berlin, Myunxen, Leypcig hám de ózi jasaǵan Drezden qalaların tamasha etti. Sonday-aq, Germaniyaǵa qońsılas bolǵan Franciyanıń paytaxtı Parij qalasına da sayaxat etip, ataqlı Luvr muzeyi hám Eyfel minarasın óz kózi menen kóriw baxtına miyassar boldı.

Anvardıń aytıwınsha, bul baǵdarlama sheńberinde jazǵı demalıs waqtında ózbekstanlı student-jaslar Germaniya mámleketinde hám jumıs islew, hám Evropanıń belgili qalalarına sayaxat etiw imkaniyatı jaratıladı eken. Bunnan tısqarı, túrli mámleketlerden jumıs islew ushın kelgen jaslar menen tanısıw, olardıń mádeniyatın úyreniwge boladı. Sonlıqtan, studentimiz bul imkaniyattan kelesi jıllarda da paydalanıp, qosımsha dáramat tawıp, ata-anasına járdem beriwdi rejelestirip atır. Házirgi waqıtta Anvar kelesi barǵanında germaniyalılar menen biymálel sóylesiw maqsetinde nemis tili kursına qatnaspaqta.

Filial baspasóz xızmeti.