Ózbekstan mámleketlik kórkem óner hám mádeniyat institutı rektorı, professor Nodirbek Sayfullaev institut professor-oqıtıwshıları menen birgelikte Qaraqalpaqstan mámleketlik Jas tamashagóyler teatrına saparı dawamında bul jerde bilimlendiriw processleriniń qalay jolǵa qoyılǵanlıǵı, ásirese, Dual bilimlendiriwdi rawajlandırıw baǵdarında ámelge asırılıp atırǵan jumıslar menen tolıq tanıstı.

Ushırasıw waqtında filial basshıları tárepinen málim etiliwinshe, búgingi kúnde Nókis filialınıń «Rejissura kórkem óneri» hám «Aktyorlıq sheberligi» kafedralarınıń ámeliyat bazaları Qaraqalpaqstan mámleketlik Jas tamashagóyler teatrı janında shólkemlestirilgen. Nátiyjede studentlerge oqıw procesi menen birge teatrda 0,5 stavkada ámeliy jumıs islew imkaniyatı jaratılǵan.

N.Sayfullaev usı eki kafedra baslıqları hám studentleri menen sáwbetlesip, olardıń ámeliy sabaqları, teatr saxnasında alıp barıp atırǵan dóretiwshilik jumısları menen qızıqtı.

Sáwbetlesiw dawamında teatrda 0,5 stavkada islep atırǵan studentler ushın barlıq zárúr sharayatlar jaratılǵanlıǵı, olar ámeliy sabaqların tikkeley teatr saxnasında ótip atırǵanlıǵı atap ótildi. Sonday-aq, studentler oqıwdı tamamlaǵannan soń usı teatrda jumıs penen támiyinleniw perspektivaları boyınsha da pikir alısıldı.

Nodirbek Sayfullaev Dual bilimlendiriwdiń áyne kórkem óner tarawı ushın qanshelli áhmietli ekenin atap ótip, institutta da bul baǵdardı rawajlandırıw boyınsha izbe-iz reformalar alıp barılıp atırǵanın atap ótti.

Sáwbet juwmaǵında professor Sayfullaev Nókis filialında alıp barılıp atırǵan jumıslar, studentlerdiń ámeliyatqa keńnen tartılıp atırǵanı, teatr menen birgelikte jolǵa qoyılǵan dual bilimlendiriw sistemasınan kewli tolǵanlıǵın bildirip, bul tájiriybe keleshekte basqa da kafedralarǵa basqıshpa-basqısh engiziliwi múmkin ekenligin atap ótti.