Usı jıl 15-oktyabr kúni Qaraqalpaqstan Respublikası Mádeniyat ministri Q.Turdiev hám Qaraqalpaqstan Respublikası Xalıq bilimlendiriw ministri R.Reymovlar filial professor-oqıtıwshıları menen ushırastı. Ilajdı filial direktorı A.Ayapov basqarıp bardı. Ushırasıwda sózge shıqqanlar sońǵı jılları elimizde ilim-bilimlendiriw hám kórkem óner tarawında ámelge asırılıp atırǵan reformalar, sonıń menen birge, jámáátiń qolǵa kirgizgen tabısların hám jetiskenliklerin ayrıqsha atap ótti.

Sońınan Ózbekstan mámleketlik kórkem óner hám mádeniyat instiutı Nókis filialı xızmetkerlerin qollap-quwatlaw maqsetinde filialǵa kóp jıllıq miyneti sińgen hám jámiyetlik jumıslarda belsendilik kórsetip kiyatırǵan bir topar professor-oqıtıwshılarǵa «Qaraqalpaqstan Respublikası Xalıq bilimlendiriw aǵlası» kókirek belgisi tapsırıldı. Onda «Xalıq dóretiwshiligi» kafedrası oqıtıwshısı N.Qallibekov, «Rejissura hám aktyor sheberligi» kafedrası oqıtıwshıları, B.Nazarımbetov hám A.Zamatdinov, «Mádeniyat hám kórkem óner mákemelerin shólkemlestiriw hám basqarıw» kafedrası aǵa oqıtıwshısı G.Abipova, filial Kásiplik awqamı shólkemli baslıǵı B.Begjanov, sonday-aq, Kadrlar bólimi baslıǵı D.Tlewmuratovalar «Qaraqalpaqstan Respublikası Xalıq bilimlendiriw aǵlası» kókirek belgisi menen sıylıqlandı.

Óz gezeginde bizde sıylıqlanǵanlardı jámáátimiz atınan qızǵın qutlıqlap, aldaǵı jumıslarında tabıslar tileymiz.

ÓzMKÓMI Nókis filialı baspasóz xızmeti.