Ózbekstan mámleketlik kórkem óner hám mádeniyat institutı Nókis filialında bilim alıp atırǵan 6 stdenttiń shártnama tólemleri Jaslar isleri agentligi tárepinen tólep berildi.

Bul haqqında Jaslar isleri agentligi Qaraqalpaqstan Respublikası basqarmasınıń málimleme xizmeti xabar berdi.

Bular «Muzıkalı teatr rejissyorlıǵı» tálim baǵdarı 2-kurs studenti Eleonora Kidrbaeva, «Saxna hám ekran kórkem óner dramaturgiyası tálim baǵdarı 2-kurs studenti Mansur Tadjetdinov,  «Qosıq hám oyın» tálim baǵdarı 2-kurs studenti Baxram  Abipov, Qosıq hám oyın» tálim baǵdarı 1-kurs studentleri Amir Saparniyazov hám Dilshoda Kidrbaeva, sonday-aq, «Qosıq hám oyın» tálim baǵdarı (sırtqı bólim) 1-kurs studenti Abdirasul Buxarbaevlardıń 2021-2022 oqıw jılı ushın shártnama tólemleri Jaslar isleri agentligi tárepinen tólep berildi.

Xabarda atap ótiliwinshe usı jıldıń 4-fevral sánesinde Jaslar isleri agentligi direktorı A.Sadullayev Nókis qalası Jaslar orayındaǵı dógerekler menen jaqınnan tanısqan edi. Usı dógerekler menen tanısıw barısında Ózbekstan mámleketlik kórkem óner hám mádeniyat institutı Nókis filialı student-jasları quramınan dúzilgen «Big dance shou» klubınıń dóretiwshiligi menen de tanısıp, usı klubtaǵı jas aǵzalar menen sáwbette boldı hám olardıń mashqalaları, usınısları menen tanıstı.  Sáwbet barısında klubtaǵı 6 jas kontrakt shártnama pulların tólewde qıyınshlıq bolıp atırǵanlıǵı, sonday-aq klub ushın zárúr inventarlar kerekligi atap ótilgeninde,   A.Sadullayev ámeliy járdem kórsetiwin aytqan edi. Múrájatlardı úyreniw juwmaǵına kóre, klubtaǵı 6 jastıń 51 mln somlıq tólew-kontrakt pulları tólep berildi.

Álbette, bul ilajlar elimizde jaslardı hár tárepleme qollap-quwatlaw hám olardıń imkaniyatların júzege shıǵarıw baǵdarındaǵı jumıslardıń ámeliy kórinisi bolıp tabıladı.

Filial baspasóz xızmeti.