Assalawma áleykum!

Húrmetli ata-analar hám abiturientler!

Bársheńizdiń xabarıńız bar, búginnen baslap Ózbekstan mámleketlik kórkem óner hám mádeniyat institutı Nókis filialında 2026-2027-oqıw jılı ushın kásiplik (dóretiwshilik) imtixanlar baslandı hám imtixanlardıń usı jıldıń 10-iyul sánesine shekem ótkeriliwi rejelestirilgen.

Usı qabıllaw procesinde Siz abiturientler hám ata-analarıńız ushın Filialımız tárepinen bir qatar sharayatlar jaratılǵanın málim etemiz.

Atap aytqanda, Siz tárepten beriletuǵın sorawlarǵa tez hám anıq juwap beriw maqsetinde filialımızda másláhát orayı shólkemlestirilgen.

Dóretiwshilik imtixanlardıń ashıq-aydınlıq hám járiyalılıǵın támiyinlew ushın imtixan ótkeriletuǵın auditoriyalarǵa arnawlı kameralar ornatılǵan hám onnan internet tarmaǵındaǵı https://kamera.uzdsmi-nf.uz/ mánzili arqalı tikkeley baqlap barıw imkaniyatı jaratılǵan.

Sonday-aq, abiturientlerdiń bilim hám kónlikpelerin bahalaw ushın tájiriybeli professor-oqıtıwshılar hám qánigeler bekitilgen bolıp, abiturentlerdiń dóretiwshilik imtixan tayarlıqları ádillik principi tiykarında bahalanıp, imtixan nátiyjeleri sol kúnniń ózinde keshki waqıtta filialdıń https://uzdsmi-nf.uz/ veb-saytı arqalı járiyalanadı.

Eń baslısı, qabıllaw processlerinde korrupciya hám tanıs-bilislik sıyaqlı jaǵdaylar baqlanbawı ushın filial tárepinen barlıq zárúr ilajlar kórilgen.

Yaǵnıy, birinshi gezekte imtixan komissiyası aǵzalarınıń bul badardaǵı juwapkershiligi arttırılıp,  hár bir abiturienttiń bilim hám talantın qalıs, ádil jáne ámeldegi nızamshılıq talapları tiykarında bahalawı, tanıs-bilislik, mápler soqlıǵısıwı yamasa basqa da hár qanday nızamsız háreketlerge pútkilley jol qoymawı ushın barlıq qawipsizlik sharaları kórilgen.

Bul ne ushın áhmiyetli? Sebebi, búgingi ádil baha xalqımızdıń erteńgi kórkem óner hám mádeniyatınıń rawajlanıwına beriletuǵın baha bolıp tabıladı. Ulıwma alǵanda, bul tek ǵana kásiplik emes, al joqarı insanıylıq juwapkershilik bolıp esaplanadı. Búgin studentlikke usınıs etiletuǵın jaslar tarawdıń erteńin belgilep beretuǵının ańlaǵan halda, bul processke instituttıń barlıq xızmetkerleri ayrıqsha itibar menen qatnaspaqta.

Húrmetli abiturientler!

Óz gezeginde, sizlerge bul processte biytanıs adamlarǵa emes, al óz talantıńızǵa,  bilim hám potencialıńızǵa iseniń deymiz!

Mámleketimiz basshısınıń atap ótkenindey: «Korrupciya –mámlekettiń rawajlanıwına tosqınlıq etetuǵın, ádillik hám nızam ústinligin izden shıǵaratuǵın, jámiyette isenim ortalıǵın tómenletetuǵın eń awır qáwip. Korrupciyaǵa jol qoyıw bolsa reformalarımızǵa qıyanet!»

Barlıq abiturientlerge kásiplik (dóretiwshilik) imtixanları hám test sınaqlarınan tabıslı ótip, student bolıw baxtına erisiwine tilekleslik bildiremiz.

K.Yusupov,

Ózbekstan mámleketlik kórkem óner hám mádeniyat institutı Nókis filialı direktorı.