Usı jıldıń 19-dekabr kúni Ózbekstan mámleketlik kórkem óner hám mádeniyat institutı Nókis filialında belgili mámleketlik hám jámiyetlik ǵayratker, Ózbekstan Qaharmanı Musa Tajetdinovich Erniyazovtı eslew keshesi bolıp ótti.

“Ataqlı mámleketlik ǵayratker, Ózbekstan Qaharmanı Musa Tajetdinovich Erniyazov – jaslar qálbinde” atamasında ótkerilgen ilajǵa filial basshılıǵı, professor-oqıtıwshılar jámááti hám student-jaslar qatnastı. Dáslep, eslew keshesin ashıp beriw ushın filial direktorı A.Ayapov sózge shıǵıp, belgili mámleketlik hám jámiyetlik ǵayratker, Ózbekstan Qaharmanı Musa Erniyazovtıń ómir jolı, respublikamızdıń ekonomikalıq-sociallıq rawajlanıwı, Aralboyındaǵı ekologiyalıq jaǵdaydı jaqsılaw, xalıqtıń turmıs dárejesin arttırıw, jaslardı qollap-quwatlaw boyınsha islegen miynetlerin ayrıqsha atap ótti. Ózbekstan Qaharmanı Musa Erniyazovtıń jarqın esteligi, xalqı ushın islegen ullı isleri Qaraqalpaqstan Respublikası xalqı hám jasları qálbinde máńgi saqlanıwına isenim bildirdi.
Bunnan soń, “Rejissura hám aktyor sheberligi” kafedrası professorı N.Ańsatbaev, “Social-gumanitar pánler” kafedrası aǵa oqıtıwshısı A.Prekeevalar sózge shıǵıp, Ózbekstan Qaharmanı Musa Erniyazovtı eske aldı. Onıń derlik 50 jıllıq miynet jolı dawamında óziniń úlken basshılıq potencialı, bay bilim hám tıjiriybesi, ruwxıy pazıyletleri, Watanımızǵa bolǵan sheksiz muxabbatı hám sadıqlıǵı menen Qaraqalpaqstan Respublikası tariyxında óshpes orın iyelegenin turmıslıq mısallar menen aytıp berdi.

 Eslew keshesi dawamında filial studenti Sh.Tursınbaev óziniń “Dáwletli el aǵası” temasındaǵı bayanatın oqıp berip,  ataqlı mámleketlik ǵayratker, Ózbekstan Qaharmanı Musa Erniyazov basshılıǵında respublikamızda kórkem óner hám mádeniyat tarawına qaratılǵan úlken itibar, jaslardı qollap-quwatlaw boyınsha islegen jumısları eske alındı.

Filial baspasóz xızmeti