Prezidentmizdiń alǵa qoyǵan bes áhmiyetli baslamasında jaslardı kórkem ónerdiń barlıq túrine keńnen tartıwǵa ayrıqsha itibar qaratılǵan bolıp, bul baǵdarda respublikamızda nátiyjeli jumıslar ámelge asırılmaqta.

Usınday ilajlardıń biri sıpatında ótken shembi kúni Ózbekstan mámleketlik kórkem óner hám mádeniyat institutı Nókis filialında «Rejissyor-aktyor mudamı hárekette» atamasında saxnalastırılǵan ádebiy keshe bolıp ótti. Oǵan filial professor-oqıtıwshıları hám student-jaslar qatnastı.

Kórkem ónertanıw fakul’teti «Rejissura hám aktyor sheberligi» kafedrası tárepinen shólkemlestirilgen keshede student-jaslar tárepinen tayarlanǵan koncert baǵdarlama jıynalǵanlarǵa qoyıp berildi. Ilaj sheńberindegi «Ómir» hám «Aral» atamalarındaǵı saxnalıq kórinislerde kúnniń baslı máselelerinen sanalǵan qorshaǵan ortalıqtıń tazalıǵın saqlaw, átirap aymaqtı abat etiw sıyaqlı kompoziciyalıq kórinisler, sonday-aq, jaslardı watansúyiwshilik ruwxında tárbiyalawǵa qaratılǵan ádebiy oqıwlar, janlı hawazda atqarılǵan yoshlı qosıqlar qatnasıwshılarda ayrıqsha tásir qaldırdı.