Búgin 6-may sánesinde Ózbekstan mámleketlik kórkem óner hám mádeniyat insititutı Nókis filialında «Babalarımızdıń bay miyrası hám milliy qádiriyatlarǵa tiykarlanǵan kúshli manawiyatqa tayanamız» atlı festival bolıp ótti. Koncertti filial direktori A.Ayapov ashıp berdi.

Ilajda Qaraqalpaqstan Respublikası Joqarǵı Keńesi deputatı G.Ayımbetova, Nókis qalası «Nuraniy» qorı baslıǵı K.Kalenderov, Qaraqalpaqstan Musılmanlar qazıyatı qazısı orınbasarı A.Jolawshiev, Xalıq deputatları Nókis qalalıq Keńesi deputatı I.Qutlımuratovalar sózge shıǵıp, elimizde barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵanlıǵı, mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılıp atırǵanlıǵın atap ótti.

Festival sheńberinde filialda awızbirshilikte hám tatıwlıqta, doslıq qatnasıqlarında oqıp bilim alıp atırǵan túrli millet wákilleri esaplanǵan student-jaslardıń, sonday-aq, elimizde jumıs alıp barıp atırǵan milliy-mádeniy oraylardıń milliy kórgizbeleri, dástúrleri, úrp-ádetleri, milliy qosıqları hám ayaq-oyınları ilaj qatnasıwshılarınıń názerine usınıldı.

QMU 4-kurs studenti Jartıbaeva Biybisara