Ózbekstan mámleketlik kórkem óner hám mádeniyat institutı Nókis filialında Qaraqalpaq mádeniyatı hám kórkem óneriniń jankúyeri, belgili kompozitor hám tájiriybeli pedagog Ulbiybi Abdullaevanıń 60 jıllıq yubileyi múnásibeti menen dóretiwshilik keshesi ótkerildi.

Saltanatlı ilajda shıǵıp sóylewshiler belgili kórkem óner jankúyeri, kompozitor hám tájiriybeli pedagogtı yubileyi menen qutlıqlap, onıń dóretiwshilik hám miynet jolına toqtalıp ótti.

Atap ótilgenindey, U.Abdullaeva  30 dan aslam balalar qosıqlarına, 30 dan aslam qosıq hám romans, fortepiano ushın shıǵarmalar, sonday-aq, Ibrayım Yusupov sózine jazılǵan «Gúller ańlamas», «Jańa jıl», Minayxan Jumanazarova sózine jazılǵan «Ele men», «Sen bolmasań», Sharigúl Payzullaeva sózine jazılǵan «Analardı uran etken xalıqpız», Gúlnara Nurlepesova sózine jazılǵan «Ana jurtım», «Watan», «Báhár», Keńesbay Raxmanov sózine jazılǵan «Ana júreginen baslanar Watan» hám basqa da shayırlar qálemine tiyisli qosıqlarǵa namalar dóretti.

Sonday-aq, xalqımızdıń súyikli kórkem filmine aylanǵan «Urı», «Kurort», «Keshir» sıyaqlı kórkem filmlerine dóretken namaları ıqlasbentler tárepinen ayrıqsha qızıǵıwshılıq penen kútip alındı.

Onıń usınday qunlı shıǵarmalar dóretiw menen birge joqarı bilimlendiriw tarawında jaslarǵa ustazlıq etip, ilim-bilim, kórkem ónerdiń álwan túrli sırların jalıqpastan úyretip kelmekte.

Tarawda atqarǵan xızmetleri Húkimetimiz tárepinen múnásip bahalanıp, “Qaraqalpastan Respublikasına miyneti sińgen kórkem óner ǵayratkeri” mámleketlik ataǵı hám “Mádeniyat hám kórkem óner pidayısı” kókirek belgisi menen  sıylıqlanıwı kóp jıllıq úzliksiz miynetlerine hám dóretiwshilik islerine berilgen joqarı baha bolıp esaplanadı.

Dóretiwshiniń shıǵarmalarınan dúzilgen koncert baǵdarlaması jıynalǵanlarǵa kóterińki keypiyat baǵıshladı.