Usı jıl 18-sentyabr kúni «II Xalıqaralıq baqsıshılıq kórkem óneri festivalı» sheńberinde «Baqsıshılıq kórkem óneriniń dúnya mádeniyatı civilizaciyasında tutqan ornı» atamasında II Xalıqaralıq ilimiy-ámeliy konferenciya ótkerilgen edi.

Onlayn tárizinde shólkemlestirilgen konferenciyada kóplegen mámleketlerdiń ilimpazları baqsıshılıq kórkem óneri tariyxı hám dúnya mádeniyatınıń rawajlanıwında tutqan ornı haqqındaǵı bayanatları menen qatnastı.

Quwanarlısı konferenciyada qatnasqan túrkiyalı alımlardan biri Ózbekstan mámleketlik kórkem óner hám mádeniyat institutı Nókis filialı docenti J.Xojanovtıń Túrkiya mámleketiniń «Scopus» bazasındaǵı ilimiy jurnalda usı jılı baspadan shıqqan «The representative of the Karakalpak theatre (Qaraqalpaq teatrınıń darǵası)» atlı ilimiy maqalasına óziniń bahalı pikirlerin bildirip ótti.

J.Xojanovtıń avtorlıǵındaǵı bul maqalada Ózbekstan xalıq artisti, belgili rejissyor, aktyor Q.Abdireymovtıń dóretiwshiligi haqqında sóz etiledi. Álbette, qaraqalpaq kórkem óner iyeleriniń dóretiwshiligi dúnya alımları názerine túsiwi xalqımız, sonıń menen birge qaraqalpaq kórkem óneri hám mádeniyatı ushın úlken maqtanısh esaplanadı.

Ilaj sońında J.Xojanov konferenciyada belsene qatnasqanlıǵı ushın shólkemlestiriwshiler tárepinen sertifikat penen sıylıqlandı.

Óz gezeginde ustazımızdı jaqınlasıp kiyatırǵan «1-oktyabr – Muǵallimler hám ustazlar kúni» ulıwmaxalıqlıq bayramı menen qızǵın qutlıqlap, aldaǵı dóretiwshilik jumıslarında tabıslar tileymiz.

ÓzMKÓMI Nókis filialı baspasóz xızmeti.