2023-jıldıń 27-mart kúni Ózbekstan mámleketlik kórkem óner hám mádeniyat institutı Nókis filialında Evropa Awqamınıń Erasmus+ baǵdarlamasınıń Ózbekstan Milliy Ofisi menen birgelikte Erasmus+ informaciyalıq qollap-quwatlaw seminarı shólkemlestirildi.

Seminarǵa Erasmus+ baǵdarlamasınıń Ózbekstan Milliy Ofisi joybar menedjeri G.Qarlıbaeva, Erasmus+ baǵdarlamasınıń Qaraqalpaqstan joqarı oqıw orınları boyınsha eksperti A.Tóreniyazova, “DSinGIS” joybarı aǵzası Y.Qudaybergenov, Qaraqalpaqstan Respublikasında jaylasqan joqarı oqıw orınlarınıń Xalıqaralıq birge islesiw bólimleriniń baslıqları, professor-oqıtıwshılar hám student-jaslar qatnastı.

Seminardı filial direktorı A.Ayapov kiris sóz benen ashıp berdi. Bunnan soń, Erasmus+ baǵdarlamasınıń Ózbekstan Milliy Ofisi joybar menedjeri G.Qarlıbaeva Erasmus plus baǵdarlaması haqqında maǵlıwmat berip, baǵdarlamanıń tiykarǵı 5 baǵdarı: Capacity Building in Higher Education, Erasmus Mundus Design Measures, International Credit Mobility, Jean Monnet, Erasmus Mundus Joint Masters baǵdarları boyınsha keń túrde sóz etti. Sonday-aq, G.Qarlıbaeva Erasmus+ joybarların tayarlaw, bilimlendiriw mákemesiniń Jeke Identifikaciya Kodın (PIC) alıw, joybar ushın Evropa universitetleri arasınan sherik izlew, joybarǵa arza tapsırıw múddetleri hám basqa da bir qatar máseleler boyınsha túsinik berdi.

Seminar dawamında Erasmus+ baǵdarlamasınıń Qaraqalpaqstan joqarı oqıw orınları boyınsha eksperti A.Tóreniyazova hám “DSinGIS” joybarı aǵzası Y.Qudaybergenovlar prezentaciya islep, Nókis mámleketlik pedagogikalıq institutı hám Qaraqalpaq mámleketlik universitetlerinde orınlaǵan Erasmus+ joybarları haqqında maǵlıwmatlar berdi.

Seminar qatnasıwshılarınıń qızıqtırǵan sorawlarına juwaplar berilip, Erasmus+ baǵdarlamasına joybar tayarlaw tuwralı másláhátler berildi.

Filial Xalıqaralıq birge islesiw bólimi