Ózbekstan Respublikası Joqarı bilimlendiriw, ilim hám innovaciyalar ministrligi hámde Ózbekstan Respublikası Ishki isler ministrligi menen birgelikte «Joqarı oqıw orınlarında huqıqbuzarlıqlar profilaktikasın ámelge asırılıwın jáne de jetilistiriw haqqında»ǵı 2024-jıl 25-marttaǵı 06/12-sanlı Qospa qarardıń orınlanıwın támiyinlew  maqsetinde hár hápteniń piyshembi kúni barlıq joqarı oqıw orınlarında «Studentler qáwipsizligi» kúni ótkeriliwi belgilengen.

Usı múnásibet penen búgin 31-oktyabr kúni Ózbekstan mámleketlik kórkem óner hám mádeniyat institutı Nókis filialında órt qáwipsizligi hám iyis gazinen záhárleniwdiń aldın alıw boyınsha úgit-násiyat jumısları alıp barıldı.

Qaraqalpaqstan Respublikası ayrıqsha jaǵdaylar basqarması Nókis qalalıq bólimi qánigesi Ruslan Qurbanbaev student-jaslarǵa filial aldında órt óshiriw hám qutqarıw ásbap-úskeneleri menen tanıstırıp, olardıń atqaratuǵın wazıypalarına toqtalıp ótti hám órt qáwipsizliginiń aldın alıw boyınsha kóplegen maǵlıwmatlar aytıp ótti.

Sonday-aq, filialımızdıń profilatika inspektorı N.Erimbetov, Ayrıqsha jaǵdaylar boyınsha puqara qáwipsizligi injeneri G.Qurbaniyazov hám Órt qáwipsizligi boyınsha instruktor S.Kamalovlar ijara úylerde turatuǵın student-jaslarǵa iyis gazden hám elektr energiyasınan durıs paydalanıw, gazlerdi ashıq halda taslap ketpew hám toqlarda telefon kuwatlawıshlardı qaldırıp ketpew, onıń aqıbetinde órt shıǵıw qáwipi bar ekenligi túwralı keńnen túsinik berdi.  

Ushırasıw dawamında oqıwshılar tiyisli taraw wákillerinen ózlerin qızıqtırǵan sorawlarına juwaplar aldı.