Ózbekstan mámleketlik kórkem óner hám mádeniyat institutı Nókis filialınıń “Vokal atqarıwshılıǵı” tálim jónelisi 1-kurs studenti Húrliman Tilepbaeva usı jıldıń 14-fevral sánesinde Qazaqstan Respublikasınıń Nur-Sultan qalasında ótkerilgen “EURO MUSIC” xalıqaralıq kóp janrlı kórkem óner tańlawına óziniń dóretpeleri menen qatnasıp, 16-19 jas kategoriyasında tańlawdıń I dárejeli laureatı diplomın alıwǵa miyassar boldı.

Bul xalıqaralıq kórkem óner tańlawına Qazaqstan, Latviya, Ukraina, Ázerbayjan, Birlesken Arab Ámirlikleri, Belarussiya, Polsha, Rossiya Federaciyası hám Ózbekstan Respublikalarınan 100 ge jaqın jas talant iyeleri qatnasqan bolıp, olardıń dóretpeleri  Evropa muzıka festivalları shólkemi, Festivallar Allyansı shólkemi, Italiya hám Ispaniya mámleketleriniń kórkem óner tarawı ekpertleri tárepinen bahalandı.

Filialımız studenti Húrliman Tilepbaeva ustazı, Qaraqalpaqstan Respublikası Xalıq artisti Gulnara Munteeva basshılıǵında xalıqaralıq tańlawǵa Edit Piaf atqarǵan “Nonje Ne Regrette Rien” hám Alla Pugachevanıń “Rechenka” qosıqları menen qatnastı hám  “EURO MUSIC” xalıqaralıq kóp janrlı kórkem óner tańlawınıń jeńimpazları qatarınan orın iyeledi.

Filialımız jámááti atınan “Xalıq dóretiwshiligi” kafedrası oqıtıwshısı Gulnara Munteeva hám shákirti Húrliman Tilepbaevalardı bul tabısı menen qutlıqlaymız.

B.Sultamuratov

Xalıqaralıq birge islesiw bólimi baslıǵı.