Búgin Ózbekstan mámleketlik kórkem óner hám mádeniyat institute Nókis filialında student-jaslar hám olardıń ata-anaları menen ushırasıw bolıp ótti. Ilajǵa Nókis qalası hákimi A.Daniyarov, Nókis qalalıq ayrıqsha jaǵdaylar bólimi baslıǵı J.Djubanıshev, fakultet dekanlarınıń orınbasarları, oqıtıwshılar profilaktikalıq inspektorı, tyutorlar hám ǵalaba xabar quralları wákilleri de qatnastı.

Ilajdı filial direktorı A.Ayapov basqarıp bardı. Ushırasıwda Nókis qalası hákimi A.Daniyarov sózge shıǵıp, búgingi kúnde student-jaslardı jámiyette óz ornın tabıwda ata-analardıń ornı ayrıqsha ekenligi, sonday-aq, jaslar tálim-tárbiyasına ayrıqsha itibar qaratıw, olardıń bos waqıtların mazmunlı ótkeriw, búgingi málimleme kommunikaciya texnologiyaları rawajlanǵan dáwirde internet hám social tarmaqlardan nátiyjeli paydalanıwın qadaǵalap barıw kerekligin ayrıqsha atap ótti.

Bunnan soń, Nókis qalalıq ayrıqsha jaǵdaylar bólimi baslıǵı J.Djubanıshev shıǵıp sóylep, hawa rayınıń suwıtıwı menen puqaralarımızda jılıtıw úskenelerine zárúrlik seziletuǵınlıǵı, bunda puqaralarımız, ásirese kreyde jasawshı student-jaslarımız gaz hám elektir úskenelerinen paydalanıwda qáwipsizlik qaǵıydalarına ámel etiw kerekligin aytıp ótti.  Sonday-aq, gúz-qıs máwsiminde qáwipsizlik ilajların kúsheytiw boyınsha usınıslar berilip, gaz plitaları hám ısıtıw sistemalarınan durıs paydalanıw, gaz qurılmaların turaqlı texnikalıq tekseriwden ótkeriw zárúrligi boyınsh túsinik berildi.

Ushırasıw dawamında ata-analar hám filial administraciyası xızmetkerleri óz-ara pikir alısıp, jaslar tárbiyasına itibardı ele de jetilistiriwde birgelikte jumıs alıp barıw kerekligi atap ótildi.

Ilaj sońında institut student-jasları tárepinen shólkemlestirilgen koncert baǵdarlaması koncert baǵdarlaması jıynalǵanlar názerine kóterińki keypiyat inám etti.

Filial baspasóz xızmeti