Sońǵı jılları elimizde joqarı bilimlendiriw mákemelerinde bilimlendiriwdiń sapasın arttırıwdıń tiykarǵı faktorlarınıń biri sıpatında professor-oqıtıwshılardı ilimiy-izertlewge baǵdarlaw, olardıń ilimiy potenciyalın kóteriw arqalı dúnyajúzlik ilimiy jámiyetshilikte, xalıqaralıq abıraylı ilimiy-texnikalıq bazalarda óz ornına iye bolıwına ayrıqsha dıqqat qaratılmaqta. Bul baǵdarda Prezidentimiz tárepinen bir qatar qarar hám pármanlar qabıl etilip, joqarı oqıw orınlarınıń aldına rawajlanǵan mámleketler tájiriybesin engiziwde dúnyajúzlik kriteriyalar tiykarında islep shıǵılǵan, jańadan-jańa talaplar hám wazıypalar belgilep berildi.

Ózbekstan Respublikası Joqarı bilimlendiriw, ilim hám innovaciyalar ministriniń 2024-jıl 20-marttaǵı 76-sanlı buyrıǵına tiykar usı jıldıń 13-15-noyabr kúnleri Filialda «Jańa Ózbekstanda tálim-tárbiya, teatr, kino, mádeniyat hám mánawiyat sistemasın jetilistiriw perspektivaları» atamasında xalıqaralıq ilimiy-ámeliy konferenciya ótkeriliwi rejelestirilgen. Usı múnásibet penen búgin filialımızda xalıqaralıq ilimiy-ámeliy konferenciya óz jumısın basladı.

Ilajǵa professor-oqıtıwshılar, kórkem ónertanıw boyınsha izleniwshiler hám student-jaslar qatnastı.

Konferenciyanı filial direktorı A.Ayapov ashıp berdi hám basqarıp bardı.

Konferenciyada Ózbekstan mámleketlik kórkem óner hám mádeniyat institutı Nókis filialı “Xalıq dóretiwshiligi” fakulteti dekanı, docent Kalbay Turdiev «Milliy mádeniyatımız hám kórkem ónerimiz – milletimiz maqtanıshı» atamasında, Ózbekstan mámleketlik kórkem óner hám mádeniyat institutı Nókis filialı “Vokal” kafedrası professorı Sársenbay Baltaniyazov «Folklordıń ádebiyat penen ózara baylanısı» atamasında, Ózbekstan mámleketlik kórkem óner hám mádeniyat institutı professorı Manzura Yuldasheva «Kreativnıe industrii kak tendenciya v sfere mejdunarodnoy obrazovatelnoy deyatelnosti» atamasında, Chelyabinsk mámleketlik mádeniyat institutınıń, professorı Bozor Safaraliev «Osobennosti socialno-kulturnoy dinamiki selskogo naseleniya» atamasında, Ózbekstan mámleketlik kórkem óner hám mádeniyat institutı Nókis filialı “Rejissura kórkem óneri” kafedrası baslıǵı, professor Lizaxan Urazmbetova «Bayram hám ǵalabalıq tamashalar» atamasında, M.O.Avezov atındaǵı Qubla Qazaqstan universiteti docenti, PhD Altınay Qadıralieva «Rámіz jáne onıń qazaq dúnietanımında alatın orını» atamasında, Qaraqalpaq mámleketlik universiteti “Kórkem ónertanıw” fakulteti docenti w.w.a. Jalǵas Abatov «Súwretlew óneri studentlerinde eryud islew kónlikpesin qáliplestiriw» atamasında hám Ózbekstan mámleketlik kórkem óner hám mádeniyat institutı Nókis filialı 1-basqısh magistrantı Biybayim Seydullaeva «Qaraqalpaqstan Respublikasında turizm tarawınıń jaslar turmısındaǵı ornı» atamasında bayanatlar jasadı.

Ilajda mádeniyat hám kórkem óner tarawınıń búgingi máseleleri, mashqalaları hám olardıń sheshimi tuwralı bahalı pikirler hám usınıslar bildirildi.

Ilaj filial student-jaslar tárepinen tayarlanǵan koncert baǵdarlaması menen dawam etti.

Filial baspasóz xızmeti