Usı jıldıń 5-mart kúni Ózbekstan mámleketlik kórkem óner hám mádeniyat institutı Nókis filialı direktorı A.Ayapov basshılıǵında májilis bolıp ótti.

Oǵan filial administraciya xızmetkerleri, professor-oqıtıwshılar, dekan orınbasarları hám tyutor qánigeleri qatnastı.

Onda filial direktorı A.Ayapov sózge shıǵıp, dáslep usı jıl 5-mart kúni Prezident Shavkat Mirziyoev basshılıǵında ótkerilgen korrupciyanıń aldın alıw boyınsha jumıslardıń nátiyjeliligi hám aldaǵı tiykarǵı wazıypalarǵa arnalǵan keńeytilgen májilisi tuwralı aytıp ótti.

Májiliste “Reformalar jolındaǵı eń úlken tosqınlıq hám irkinish – bul korrupciya bolıp esaplanadı. Bunı dúnya tájiriybesi de tolıq tastıyıqlaydı. Korrupciya aqıbetinde jáhán ekonomikası jılına 3 trillion dollar zıyan kórip atırǵanı bul globallıq qáwip ekeninen derek beredi”, — dedi Prezident. Bunnan 7-8 jıl burın joqarı oqıw orınlarına oqıwǵa kiriwde «tanıs-bilisshilik» háwij alǵanlıǵı, taraw sanlastırılǵanlıǵı, imtixanlar onlayn translyaciya etiliwi nátiyjesinde korrupciyalıq illetlerdiń aldın alınǵanlıǵı, sonday-aq, Joqarı bilimlendiriwde 35 túrdegi hújjetlerdi insan faktorısız alıwǵa ótilgeni ushın tarawdaǵı múrájatlar 2,2 esege azayǵanlıǵı boyınsha Prezidentimiz májiliste atap ótkenligin aytıp ótti.

Sonıń menen birge, filial direktorı A.Ayapov májiliste student-jaslardıń sabaqqa qatnası, studentlerdıń pitkeriw qánigelik jumısları, olardıń diplom jumısları, ámeliyattaǵı studentlerdiń ámeliyat orınlarınan xabar alıw, student-jaslardıń kontrakt tólemleri, ishki tártip qaǵıydaların saqlaw boyınsha da aytıp ótti.

Májilis sońında tiyisli juwapkerlerge anıq wazıypalar belgilep berildi.