Házirgi kúnleri pútkil elimiz boylap joqarı oqıw orınlarında bilim alıp atırǵan studentlerdi kitapqumarlıqqa qızıqtırıw hám usı arqalı olardıń kórkem ádebiy sawatlılıq dárejesin arttırıw, jaslardı Watansúyiwshilik hám elimiz keleshegine juwapkershilikli etip tárbiyalawǵa qaratılǵan «Máripat taratıp» joybarı ámelge asırılmaqta.

Usı joybar sheńberinde Ózbekstan mámleketlik kórkem óner hám mádeniyat institutı Nókis filialında Ózbekstan hám Qaraqalpaqstan xalıq jazıwshısı Orazbay Ábdiraxmanov, Ózbekstan Respublikasına xızmet kórsetken mádeniyat xızmetkeri, Qaraqalpaqstan xalıq shayırı Rustam Musurmon hám shayıra Zebo Mirzaevalar menen ushırasıw keshesi shólkemlestirildi.

Kesheni filial direktorı A.Ayapov ashtı hám basqarıp bardı.

Onda belgili shayır, jazıwshılarımız shıǵıp sóylep, jaslar qálbinde ana Watanǵa muhabbat hám sadıqlıq tuyǵıların oyatıwda kórkem ádebiyattıń tutqan ornı ayrıqsha ekenligin, sonıń ushın elimizde kitapqumarlıqtı úgit-násiyatlaw boyınsha kóplegen ilajlar islenip atırǵanın atap ótti.

Óz-ara ashıq hám qızǵın túrde ótken ushırasıw keshesinde student-jaslar tárepinen keshe miymanlarına ádebiy dóretiwshilik, xalıqlar ádebiyatı hám mádeniy baylanıslar haqqındaǵı sorawlar berip, olarǵa tiyisli juwaplar aldı.

Ótkerilgen ádebiy keshe dawamında filialımızdıń talantlı studentleri jáne «Tumar» ansambli aǵzaları tárepinen keshe qatnasıwshılarına koncert baǵdarlaması qoyıp berildi.