Búgin Ózbekstan mámleketlik kórkem óner hám mádeniyat institutı Nókis filialında «Ózbekstan – kóp milletli, keńpeyil úlke» atamasında ruwxıy aǵartıwshılıq ilajı bolıp ótti.

Ilaj sheńberinde filialda awızbirshilikte hám tatıwlıqta, doslıq qatnasıqlarında oqıp bilim alıp atırǵan túrli millet wákilleri esaplanǵan student-jaslardıń, sonday-aq, elimizde jumıs alıp barıp atırǵan milliy-mádeniy oraylardıń milliy kórgizbeleri, dástúrleri, úrp-ádetleri, milliy qosıqları hám ayaq-oyınları ilaj qatnasıwshılarınıń názerine usınıldı.

Ilajda Qaraqalpaqstan Respublikası Ministrler Keńesi Baslıǵınıń Jámietlik hám diniy shólkemler menen baylanıslar boyınsha orınbasarı A.Allaniyazov, Qaraqalpaqstan Respublikası Nuranıylar fondı baslıǵı T.Abdijapparov, Respublika Ruwxıylıq hám aǵartıwshılıq orayı Qaraqalpaqstan bólimi baslıǵı T.Atamuratov, Respublika úgit-násiyat toparı aǵzası, jaslar ustazı B.Sultanov, Ozbekstan Respublikası Din isleri komiteti Qaraqalpaqstan Respublikası aymaqlıq basqarması kánigeleri miymanda boldı.

Ilajdı filial direktorı Q.Yusupov kiris sóz benen ashtı hám basqarıp bardı. « Ózbekstan – kóp milletli, keńpeyil úlke» atamasındaǵı xalıqlar doslıǵın jırlawǵa baǵıshlanǵan festivalda miymanlarımız shıǵıp sóylep, elimizde milletler ara tatıwlıq, puxaralardıń huqıq hám erkinliklerin támiyinlew hám kóp milletli wákillerdiń tatıwlıqta jasap kiyatırǵanlıǵı boyınsha kóplegen maǵlıwmatlardı aytıp ótti.

Búgingi kúnde elimizde 130 dan aslam hár qıylı millet wákilleri tatıw hám awızbirshilikte jasap, miynet etip, úrp-ádet hám dástúrlerine húrmet penen qarap, hár bir milletke tiyisli bayramlardı keń túrde belgilewge ayrıqsha itibar qaratılǵan. Kóp milletli xalıqımız bir maqset, bir ideya jolında birlesip, elimizdi rawajlandırıw jolında miynet etpekte.

Ilajda filial student-jasları tárepinen tuwısqan xalıqlardıń milliy qosıq hám ayaq oyınları atqarılıp, jıynalǵanlarǵa ózgeshe zawıq baǵıshladı.