Qaraqalpaqstan Respublikası Ministrler Keńesiniń protokolı tiykarında Qaraqalpaqstan Respublikasında usı jıl 11-16-noyabr kúnleri “Keńpeyillik hápteligi”n shólkemlestiriw hám ótkeriw belgilengen. Usı múnásibet penen búgin Ózbekstan mámleketlik kórkem óner hám mádeniyat institutı Nókis filialında «Ózbekstan – ulıwma úyimiz!» atamasında ruwxıy aǵartıwshılıq ilajı bolıp ótti.

Ilaj sheńberinde filialda awızbirshilikte hám tatıwlıqta, doslıq qatnasıqlarında oqıp bilim alıp atırǵan túrli millet wákilleri esaplanǵan student-jaslardıń, sonday-aq, elimizde jumıs alıp barıp atırǵan milliy-mádeniy oraylardıń milliy kórgizbeleri, dástúrleri, úrp-ádetleri, milliy qosıqları hám ayaq-oyınları ilaj qatnasıwshılarınıń názerine usınıldı.

Ilajda Nuranıy ustaz B.Sultanov, Din isleri boyınsha komitettiń Qaraqalpaqstan Respublikası aymaqlıq basqarması, Nókis qalası bas qánigesi K.Nizamatov, Qaraqalpaqstan Respublikası IIM terrorizimge qarsı gúresiw bólim baslıǵı N.Tajimuratov, Qaraqalpaqstan Respublikası IIM terrorizimge qarsı gúresiw bólimi xızmetkeri S.Tanabergenov hám Nókis qalası mádeniyat bólimi xızmetkeri Z.Utemuratovalar miymanda boldı.

Ilajdı filial direktorı A.Ayapov kiris sóz benen ashtı hám basqarıp bardı. «Ózbekstan – ulıwma úyimiz!» atamasındaǵı xalıqlar doslıǵın jırlawǵa baǵıshlanǵan festivalda miymanlarımız shıǵıp sóylep elimizde milletler ara tatıwlıq, puxaralardıń huqıq hám erkinliklerin támiyinlew hám kóp milletli wákillerdiń tatıwlıqta jasap kiyatırǵanlıǵı boyınsha kóplegen maǵlıwmatlardı aytıp ótti.

Búgingi kúnde elimizde 130 dan aslam hár qıylı millet wákilleri tatıw hám awızbirshilikte jasap, miynet etip, úrp-ádet hám dástúrlerine húrmet penen qarap, hár bir milletke tiyisli bayramlardı keń túrde belgilewge ayrıqsha itibar qaratılǵan. Kóp milletli xal¬qımız bir maqset, bir ideya jolında birlesip, elimizdi rawajlandırıw jolında miynet etpekte.

Sonı da aytıp ótiw orınlı, Qaraqalpaqstan Respublikası Ministirler Keńesi tárepinen jámiyette keńpiyillik, óz-ara húrmet hám miyrim-sháppát sezimin kúsheytiwde, milletlerara tatıwlıq hám diniy keńpiyillikti támiyinlewde, kóp milletli úlken birden-bir shańaraq sezimin bekkemlewde, radikalizim hám jat illetlerdiń aldın alıw, jas áwlattı Ana-Watanǵa muxabbat hám sadıqlıq, milliy hám ulıwmainsanıylıq qadiriyatlarǵa húrmet ruwxında tárbiyalaw jolındaǵı alıp barıp atırǵan jumısları ushın Ózbekstan mámleketlik kórkem óner hám mádeniyat institutı Nókis filialı jámáátine “Minnetdarshılıq” bildirildi.

Ilajda filial student-jasları tárepinen tuwısqan xalıqlardıń milliy qosıq hám ayaq oyınları atqarılıp, jıynalganlarǵa ózgeshe zawıq baǵıshladı.

Filial baspasóz xızmeti