Respublikamızda 9-14-sentyabr kúnleri «Xan atlas» festivalı ótkeriliwi belgilenip, házirgi waqıtta orınlarda bul festival kóterińki ruwxta ótkerilmekte.

Búgin Ózbekstan mámleketlik kórkem óner hám mádeniyat institutı Nókis filialında da «Xan atlas-2024» festivalı ótkerilip, onda oqıtıwshılar menen birgelikte student-jaslar ózleriniń ájayıp, tákirarlanbas milliy kiyimler kórgizbesi menen belsene qatnastı.

Festival sheńberinde qaraqalpaq hám ózbek xalıqlarınıń milliyligin sáwlelendiriwshi kórgizbe shólkemlestirilip, onda eki xalıqtıń milliy kiyim-kenshekleri, tutınıw buyımları qoyılıp,  xan atlasta kiyingen qatnasıwshılar festivalǵa ózgeshe zawıq baǵıshladı.

Ilajdı ótkeriwden tiykarǵı maqset – tuwısqan ózbek xalqınıń ásirlerge teń ótmishi, úrp-ádeti hám dástúrleri, estetikalıq qarasları, ózine tán ózgeshelikleri jámlengenligin sáwlelendiriw hám úgit-násiyatlawdan ibarat.

Filial direktorınıń hayal qızlar máseleleri boyınsha másláhátshisi Oralxan Qdirniyazova hayal-qızlardı ilajǵa belsene qatnasıwǵa shaqırıp, ilaj qatnasıwshılarına festivaldıń áhmiyeti, jipek gezlemesiniń insan salamatlıǵına paydalı tárepleri hám estetikalıq gózzallıq baǵıshlaytuǵınlıǵı haqqındaǵı pikirlerin bildirip ótti.