Búgingi kúnde elimizde milliy ónermentshilik túrleri, qol ónerin rawajlandırıw, isbilermenlik jumısın keńeytiw hám usı tiykarda hayal-qızlardıń  belsendiligin arttırıw, olardıń bántligin támiyinlewge ayrıqsha itibar qaratılıp kelinbekte. Olardı qollap-quwatlaw hám zárúr shárayatlardı jaratıw maqsetinde  bir qatar unamlı jumıslar islenbekte. Mine, usınday isbilermen hayal-qızlardıń biri Qaraqalpaqstan Respublikası Ónermentler birlespesi aǵzası, nókisli Gúljáhán Zarimova biraz jıllardan berli ónermentshilik penen shuǵıllanıp kelmekte. Tiykarǵı kásibi  oqıtıwshılıq bolǵan ol óz oqıwshılarına bilim beriwden tısqarı olardı kásip-ónerge baǵdarlap, óner úyretpekte.

Búgin, 25-oktyabr kúni Ózbekstan mámleketlik kórkem óner hám mádeniyat institutı Nókis filialı Hayal-qızlar máseleleri boyınsha direktor másláhátshisi O.Kıdırniyazova basshılıģında ónerment, jeke tártiptegi isbilermen G.Zarimovanıń jumısları menen student-qızlarǵa jaqınnan tanıstırıw maqsetinde, «Hayal-qızlar biznesine bir qádem» atamasında ushırasıw keshesi shólkemlestirildi.

Ushırasıw keshesine fililalımızdıń «Mádeniyat mákemelerin basqarıw» qánigeliginiń student-qızları hám koordinatorlar qatnastı.

Ushırasıw keshesinde miymanımız isbilermen G.Zarimova student-qızlarǵa búgingi kúnde mámleketimiz tárepinen hayal-qızlarǵa berilip atırǵan imkaniyatlar, isbilermenler ushın jeńillikler hámde isbilermenlik jumısın baslaǵanda nelerge itibar beriw kerekligi haqqında aytıp ótti. Sonday-aq,  hár qıylı tańlaw hám kórgizbelerde qatnasıp jaqsı nátiyjelerge erisip kiyatırǵanlıǵın ásirese, 2023-jıldıń 25-26-noyabr kúnleri Moskva qalasında bolıp ótken EvroAziya milliy lipasları modası tańlawında ónermentshilik jumısları menen qatnasıp, sıylı orındı iyelegenin aytıp ótti hám qol miynetleri kórgizbesi student-qızlarǵa qoyıp berildi.

Ushırasıwda student-qızlar ózlerin qızıqtırǵan sorawlarına juwaplar aldı.