Gúz-qıs máwsiminiń baslanıwı menen jılıtıw úskenelerine zárúrlik seziledi. Jılıtıw úskeneleine bolǵan mútájliklerimizdi qanaatlandırıwda olardıń sazlıǵına ayrıqsha itibar qaratıw talap etiledi. Bul baǵdaradǵı jumıslardı úgit-násiyatlaw hám iyis gazı menen baylanıslı bolǵan kewilsiz jaǵdaylardıń aldın alıw maqsetinde búgin Ózbekstan mámleketlik kórkem óner hám mádeniyat institutı Nókis filialında Nókis qalalıq ayrıqsha jaǵdaylar bólimi xızmetkerleriniń qatanasıwında ilaj bolıp ótti.

Ushırasıwdı filial direktorı A.Ayapov alıp bardı. Onda Nókis qalalıq ayrıqsha jaǵdaylar inspektorları Z.Vaisov hám D.Sultanovlar shıǵıp sóylep, hár bir puqara gúz-qıs máwsimi baslanıwı menen ózleriniń jasap atırǵan turaq jayların kózden ótkerip, qazanxana morılarınıń sazlıǵı, gaz hám elektr úskenelerinen paydalanǵanda texnikalıq qáwipsizlik qaǵıydalarına ámel etiw kerekligi boyınsha túsinik berip ótti.

Ilajda atap ótilgenindey, iyis gaz hám elektr úskeneleri menen baylanıslı ayrım jaǵdaylarda puqaralardıń belgilengen qaǵıydalarǵa ámel etpeslik xalatları ushırasıp, kewilsiz jaǵdaylar kelip shıqpaqta. Bunday iyis gazı menen baylanıslı bolǵan kewilsiz waqıyalardıń aldın alıwda qazanxana morıları tazalıǵın kózden ótkeriw, gaz úskenesinen imarat ishin ısıtıw hám onıń ústine kiyimlerdi qurıtıw hám plitanı qarawsız qaldırıwǵa jol qoymaw talap etiledi. Egerde imarat ishinde gaz iyisi sezilse, ayna hám qapılardı ashıw, kóshege shıǵıw hám 104 yaki 1054 qutqarıw xızmetine qońıraw etiw kerek. Bunday jaǵdaylarda svet, ot jaǵıw, elektr úskenelerin iske qosıw qadaǵan etiledi.

Sonday-aq, gaz iyisin sezgende gaz plitaları hám ısıtıw pechlerin gaz tarmaǵınan óshiriw, esik hám aynalardı ashıw, xanalardı samallatıw, xanadaǵa elektr úskeneelerin qospaw yaki janıp qalǵan bolsa óshirmew talap etiledi. Sebebi, bul órt yaki gaz-hawa aralaspasınıń shaǵılısıwına alıp keliwi múmkinligi atap ótildi.

Álbette, usı atap ótilgen qaǵıydalarǵa ámel etsek iyis gazi hám órtlerdiń kelip shıǵıwınıń aldın alǵan bolamız.

Filial baspasóz xızmeti