Ózbekstan mámleketlik kórkem óner hám mádeniyat institutı Nókis filialında ruwxıy-aǵartıwshılıq, jaslar tálim-tárbiyası hám olar arasında huqıqbuzarlıqlardıń aldın alıw, sonday-aq, korrupciya menen baylanıslı bolǵan jınayatlardı boldırmaw   máselelerine baǵıshlanǵan ilaj bolıp ótti. Oǵan filial administraciya xızmetkerleri, bólim baslıqlar, dekan orınbasarları hám professor-oqıtıwshılar qatnastı.

Ilajda filial direktorı A.Ayapov jaslar arasında jınayatshılıq hám huqıqbuzarlıqlardıń aldın alıwda tálim-tárbiya jumıslarınıń nátiyjeliligin arttırıw, olardı ilimge, kórkem ónerge hám basqa da paydalı shınıǵıwlarǵa baǵdarlaw, jol-joba kórsetiw baǵdarındaǵı jumıslarımızdı ele de jetilistiriw, sonday-aq, elimiz boylap «16-noyabr – Xalıqaralıq keńpeyillik kúni» múnásibeti menen ótkerilip atırǵan «Ózbekstan ulıwma úyimiz» atamasındaǵı ruwxıy-aǵartıwshlıq ilajlarınıń mazmun-áhmiyetin jaslar arasında keńnen úgit-násiyatlaw  kerekligin ayrıqsha atap ótti.

Bunnan soń, dekan orınbasarı Q.Yakubov shıǵıp sóylep, búgingi gloaballasıw dáwirinde jaslardıń internet hám málimleme kommunikaciya texnologiyalarınan nátiyjeli paydalanıwın turaqlı úgit-násiyatlaw, sonday-aq, ǵalabalıq mádeniyattıń túrli tásirlerinen qorǵaw, sóylew ádebi, kiyiniw mádeniyatına itibar qaratıw, olardı kóbirek kerekli, paydalı islerge baǵdarlaw bárshemizdiń teńdey wazıypamız ekenligin atap ótti.

Májiliste korrupciya menen baylanıslı bolǵan jınayatlardı boldırmaw, onnan awlaq bolıw, jámiyetimizge jat bolǵan bul unamsız illetke qarsı gúresiw hám onıń aldın alıw tek ǵana taraw xızmetkerleriniń jumısı emes, bárshemizdiń teńdey wazıypamız ekenligi túsindirildi.

Óz-ara pikir alısıw tárizinde bolıp ótken ilajda isleniwi tiyis wazıypalar belgilenip alındı.

Filial baspasóz xızmeti.