Usı jıldıń 1-noyabr kúni Tórtkúl rayonındaǵı Mádeniyat orayında Ózbekstan mámleketlik kórkem óner hám mádeniyat institutı Nókis filialı tárepinen “Rus klassikleri qaraqalpaq tilinde sóyleydi” joybarı sheńberinde A.P.Chexovtıń “Sudtan aldınǵı tún” spektakli Ellikqala, Beruniy, Tórtkúl rayonlarındaǵı joqarı oqıw orınlarınıń student-jasları, kásip-óner mektepleri oqıwshıları hám Tórtkúl rayonı turǵınları názerine usınıldı .

 Dáslep joybar administratorı B.Sultamuratov tamashagóylerge  filial tariyxı hám búgingi turmısı haqqında qısqasha sóz etip, “Rus klassikleri qaraqalpaq tilinde sóyleydi” joybarı maqseti hám wazıypaları haqqında aytıp berdi. Bunnan soń, saxna perdeleri kóterilip, filialdıń «Teatr kórkem óneri» fakultetiniń tájiriybeli professor-oqıtıwshıları hám talantlı student-jasları tárepinen saxnalastırılǵan ataqlı rus dramaturg-jazıwshıları A.P.Chexovtıń «Sudtan aldınǵı tún» spektakli tamashagóyler názerine usınıldı.

Spektakl tamashagóyler tárepinen jaqsı kútip alındı hám ilaj sońında spektaklde obrazlardı jaratıp bergen aktyorlar menen estelikke súwretke tústi. Sonıń menen, “Rus klassikleri qaraqalpaq tilinde sóyleydi” joybarı dóretiwshilik toparınıń Tórtkúl rayonına bolǵan saparı óz juwmaǵına jetti.

Ámeliyatshı Nurlıbaev Abdiqadir

Qaraqalpaq mámleketlik universiteti “Málimleme xızmeti hám jámiyetshilik penen baylanıslar tálim baǵdarınıń ”3-kurs studenti