8-mart – Xalıqaralıq hayal-qızlar kúni

Jasarıw hám jańalanıw paslınıń dáslepki bayramı «8-mart – Xalıqaralıq hayal-qızlar kúni» múnásibeti menen analarımızdı, apa-qarındaslarımızda, qalaberse jámáátimiz hayal-qızların shın kewilden qutlıqlayman.

Búgingi kúnde jámiyetimizdiń qaysı bir tarawın alıp qaramayıq onda pidáyı miynet etip atırǵan hayal-qızlarımız mámleketimiz rawajlanıwı jolında múnásip úles qosıp kelmekte.

Ózbekstan mámleketlik kórkem óner hám mádeniyat institutı Nókis filialında jaslarǵa ilim-bilim sırların úyretip atırǵan professor-oqıtıwshılardıń 49 procentin hayal-qızlar quraydı. Olar arasınan 3 ilim kandidatı, 7 (PhD), 15 docent hám 7 professor, sonıń menen birge, Kórkem óner ǵayratkerleri, xalıq artistleri, Ózbekstan hám Qaraqalpaqstan Respublikalarına xızmet kórsetken artist, «Nihol» sıylıǵı laureatı, «Zulfiya» atındaǵı mámleketlik sıylıq iyeleriniń bar ekenligi jámáát ushın úlken maqtanısh esaplanadı.  

Sonı ayrıqsha atap ótiwimiz tiyis, 2025-2026-oqıw jılında filialımız hayal­ professor-oqıtıwshıları ilimiy dóretiwshilik baǵdarında bir qatar tabıslardı qolǵa kirgizdi. Atap aytqanda «Mádeniyat iskerligi» kafedrası oqıtıwshısı G.Bektursınova filosofiya ilimleri boyınsha filosofiya doktorı (PhD) doktorlıq dissertaciyasın qorǵap shıǵıwǵa eristi. Sonday-aq, Social-gumanitar pánler kafedrası (PhD) oqıtıwshıları S.Fayzullaeva, A.Utepbergenova, «Kitapxana iskerligi» kafedrası oqıtıwshısı D.Aytimova, «Xalıq dóretiwshiligi» kafedrası oqıtıwshısı Z.Yuldasheva hám «Kórkem ónertanıw» kafedrası oqıtıwshısı M.Xojanovalar docent ilimiy ataǵın alıwǵa miyasar boldı. 

Jáne bir maqtanısh, 2025-2026 oqıw jılında bes student qızımız  mámleketlik stipendiya jeńimpazı bolıw baxtına miyasar boldı. Ayta bersek jetiskenliklerimiz, qolǵa kirgizgen tabıslarmız kóp. Álbette, bul jetiskelikler elimizde hayal-qızlarǵa bolǵan itibar hám olardı hár tárepleme qollap-quwatlaw baǵdarında alıp barılıp atırǵan jumıslardıń ámeliy kórinisi esaplanadı.

Bárshe hayal-kızlardı jáne bir márte jasarıw hám jańalanıw áyyyamı menen jáne bir márte qutlıqlap, perzentlerińizdi bárkamal, salamat insanlar etip tárbiyalaw, ilim-bilimlendiriw tarawındaǵı iygilikli islerińizde tabıslar tileymen.

Baxtımızǵa hámiyshe aman bolıń, 

Áziz hayal-qızlar!

Húrmet penen,

Kuanıshbay Yusupov,

Ózbekstan mámleketlik kórkem óner hám mádeniyat  institutı Nókis filialı direktori.